చిత్ర పరిశ్రమ కోసం మెగా మీటింగ్‌
- IndiaGlitz, [Wednesday,May 20 2020]
ప్ర‌స్తుతం కరోనా ప్ర‌భావం వ‌ల్ల ఇబ్బందులు ప‌డుతున్న ప‌లు రంగాల్లో సినీ పరిశ్రమ ముందు వ‌రుస‌లో ఉంది. థియేట‌ర్స్ మూత‌ప‌డ‌టం, షూటింగ్స్ లేక‌పోవ‌డం వంటి కార‌ణాలతో సినీ పరిశ్రమ స్తంభించింది. దీంతో విడుద‌ల‌కు సిద్ధ‌మైన ప‌లు సినిమాల విడుద‌ల‌లు ఆగిపోయాయి. అదే స‌మ‌యంలో ప్ర‌భుత్వాలు ప‌లు రంగాల‌కు స‌డ‌లింపులు ఇస్తున్నాయి. ఈ నేప‌థ్యంలో చిత్ర ప్రముఖులు సినిమా రంగానికి సంబంధించిన కీల‌క నిర్ణ‌యాలు తీసుకోవాల‌ని అనుకుంటున్నార‌ట. అందులో భాగంగా ఇప్ప‌టికే కొన్ని విష‌యాల్లో సినీ పెద్ద‌లు కొంత మేర‌కు చ‌ర్చ‌లు జ‌రిపారు.
సినిమా థియేట‌ర్స్‌ను ఓపెన్ చేయ‌డం, సినిమా షూటింగ్‌ల‌ను ప్ర‌భుత్వం విధించిన నిబంధ‌న‌ల మేర‌కు కొన‌సాగించ‌డం అనే విష‌యాల‌పై మెగాస్టార్ చిరంజీవి చిత్ర పరిశ్ర‌మలోని ప్ర‌ముఖ ద‌ర్శ‌కులు, నిర్మాత‌ల‌తో చ‌ర్చ‌లు జ‌రప‌డానికి రెడీ అయిన‌ట్లు వార్త‌లు విన‌ప‌డుతున్నాయి. ఈ చ‌ర్చ‌ల అనంతరం సీఎం కేసీఆర్ర, ఇత‌ర ప్ర‌భుత్వం పెద్ద‌ల‌ను క‌లుసుకోవాల‌ని చిరంజీవి స‌హా ఇత‌ర సినిమా పెద్ద‌లు ఆలోచిస్తున్నారు. చిత్ర సీమ‌లో ఏర్ప‌డ్డ న‌ష్టాల‌ను భ‌ర్తీ చేసేలా ప్రేక్ష‌కుడిని తిరిగి థియేట‌ర్‌కు ర‌ప్పించేలా చ‌ర్య‌లు తీసుకునే అవ‌కాశాలున్నాయ‌ని టాక్‌.