మెగా బ్లడ్ బ్రదర్ నూర్‌కు చెర్రీ 10 లక్షల సాయం
- IndiaGlitz, [Monday,December 09 2019]
మెగాహీరోలను.. మరీ ముఖ్యంగా మెగాస్టార్ చిరంజీవి అంటే ప్రాణంగా అభిమానించే హైదరాబాద్‌కు చెందిన వీరాభిమాని నూర్ మహ్మద్ ఆదివారం నాడు మృతి చెందిన విషయం తెలిసిందే. వీరాభిమాని చనిపోయాడని తెలుసుకున్న మెగాస్టార్ చిరంజీవితో పాటు పలువురు మెగా హీరోలు చలించిపోయారు. వెంటనే నూర్ నివాసానికి వెళ్లిన మెగా హీరోలు... ఆయన భౌతిక కాయానికి నివాళులు అర్పించి.. నూర్ కుటుంబ సభ్యులను ఓదార్చి మీకు అన్ని విధాలా అండగా ఉంటామని అభయమిచ్చారు. ఈ సందర్భంగా మాటచెప్పిన విధంగానే నూర్ కుటుంబానికి రామ్ చరణ్ భారీగా ఆర్థిక సహాయం ప్రకటించాడు.
పవిత్ర ఆత్మకు శాంతి కలగాలి..
షూటింగ్‌లో బిజీబిజీగా ఉండటంతో వీరాభిమానిని రామ్ చరణ్ కడసారి చూడలేకపోయాడు. అయితే షూటింగ్ ముగించుకుని రాగానే నూర్ కుటుంబీకులను కలుస్తానని చెర్రీ చెప్పాడు. ఈ క్రమంలో నూర్ కుటుంబానికి రూ. 10 లక్షల సాయం ప్రకటించాడు. ఈ సందర్భంగా నూర్ అహ్మద్‌తో తమ మెగా ఫ్యామిలీకున్న అనుబంధాన్ని గుర్తు చేసుకుంటూ ఓ ప్రకటన విడుదల చేశాడు. ‘మా కుటుంబంలో ఎవరి పుట్టినరోజైన రక్తదాన శిబిరాలతో పాటు ఎన్నో సేవా కార్యక్రమాలు నిర్వహించిన నూర్ అహ్మద్ సేవలు వెలకట్టలేం. ఆయనలేని లోటు తీరనిది. గతంలో ఒకసారి ఆయన హాస్పిటల్‌లో ఉన్నపుడు నేను స్వయంగా వెళ్లి పరామర్శించాను. నూర్ మరణ వార్త మమ్మల్ని తీవ్రంగా కలిచివేసింది. మెగా బ్లడ్ బ్రదర్ నూర్ అహ్మద్ పవిత్ర ఆత్మకు శాంతి కలగాలని ఆ భగవంతుణ్ణి కోరకుంటున్నాను’ అని ప్రకటనలో రామ్ ఒకింత భావోద్వేగానికి లోనయ్యాడు.