'தி பேமிலி மேன்-2' தொடரை தடை செய்ய தமிழக அரசுக்கு அதிகாரம் உண்டா? அமைச்சர் மனோ தங்கராஜ் தகவல்
- IndiaGlitz, [Monday,June 07 2021]
சமந்தா, ப்ரியாமணி உள்பட பலர் நடிப்பில் சமீபத்தில் ஓடிடியில் வெளியான ’தி பேமிலி மேன்-2’ என்ற வெப்தொடருக்கு ரசிகர்கள் மத்தியில் நல்ல வரவேற்பு கிடைத்த நிலையில் ஒரு சில அரசியல்வாதிகள் இந்த தொடருக்கு எதிர்ப்பு தெரிவித்து வருகின்றனர். நாம் தமிழர் கட்சி சீமான் உள்பட ஒருசில அரசியல் கட்சி தலைவர்கள் இந்த தொடருக்கு எதிர்ப்பு தெரிவித்து அறிக்கை வெளியிட்டுள்ளனர் என்பதும் இதனால் பெரும் பரபரப்பு ஏற்பட்டுள்ளது என்பது குறிப்பிடத்தக்கது.
மேலும் ’தி பேமிலி மேன்-2’ தொடரை தடை செய்ய வேண்டும் என தமிழக அரசு ஏற்கனவே மத்திய அரசுக்கு கடிதம் எழுதியது என்பது குறிப்பிடத்தக்கது. இந்த நிலையில் ’தி பேமிலி மேன்-2’ தொடரை தடை செய்வது குறித்து அமைச்சர் மனோ தங்கராஜ் அவர்கள் கருத்து தெரிவித்துள்ளார்.
’தி பேமிலி மேன்-2’ வெப்தொடரை தமிழக அரசு எதிர்க்கிறது என்றும், ஆனால் அதே நேரத்தில் அந்த தொடரை தடை செய்ய தமிழக அரசுக்கு அதிகாரம் இல்லை என்று தெரிவித்தார். தமிழக அரசு மற்றும் தமிழக அரசியல் கட்சிகளின் கோரிக்கையை ஏற்று ’தி பேமிலி மேன்-2’ தொடரை தடை செய்யுமா மத்திய அரசு? என்பதை பொறுத்திருந்துதான் பார்க்க வேண்டும்.