ఆరు రోజుల క్రితం మిస్సయిన దాసరి నారాయణరావు పెద్ద కుమారుడు దాసరి ప్రభు ఆచూకీ లభ్యమైంది. గురువారం రోజు ఇంట్లో నుంచి వెళ్లిపోయిన ప్రభు బుధవారం మధ్యాహ్నం నాలుగు గంటల ప్రాంతంలో హైదరాబాద్‌లోని తన ఇంటికి చేరుకున్నారు. కాగా.. గతవారం దాసరి ప్రభు అదృశ్యమైనట్టు ఆయన కుటుంబ సభ్యులు జూబ్లీహిల్స్‌ పోలీసు స్టేషన్‌లో ఫిర్యాదు చేసిన సంగతి తెలిసిందే. అయితే ఆయన ఇంటికి చేరుకున్న విషయం తెలుసుకున్న పోలీసులు.. అదుపులోకి తీసుకుని విచారిస్తున్నట్లు తెలుస్తోంది. ఎందుకు ఇళ్లు వదలి వెళ్లిపోయారు..? ఇంట్లో ఏమైనా గొడవలు జరిగాయా..? ఆరు రోజులుగా ఎక్కడున్నారు..? ఇలా పలు కోణాల్లో పోలీసులు ప్రభుపై ప్రశ్నల వర్షం కురిపిస్తున్నట్లు సమాచారం.

కాగా.. మొదట ప్రభు.. చిత్తూరు జిల్లాకు వెళ్లినట్టు గుర్తించిన పోలీసులు అక్కడి పోలీసులకు సమాచారం అందించారు. త్వరలోనే చిత్తూరు జిల్లా పోలీసులతో మాట్లాడి హైదరాబాద్‌కు రప్పిస్తామని దాసరి కుటుంబ సభ్యులకు అభయం చెప్పి బుధవారం సాయంత్రం హైదరాబాద్‌కు రప్పించారు. కాగా.. దాసరి ప్రభుకు రెండు పెళ్లిళ్లు అయ్యాయి. మొదటి భార్య సుశీలతో ప్రభుకు గతం నుంచే అనేక వివాదాలున్నాయి. ఈ నేపథ్యంలో ఆయన అటు ఇటు తిరుగుతున్నారని సమాచారం. పోలీసుల తాజా విచారణలో ఈ వ్యవహారాలన్నింటికీ ఫుల్‌స్టాప్ అవకాశాలు మెండుగా ఉన్నాయి.