மலையாள சூப்பர் ஸ்டார் மோகன்லால் நடிப்பில், நடிகர் மற்றும் இயக்குனர் பிரித்விராஜ் இயக்கத்தில் உருவாகிய ’லூசிபர்’ திரைப்படத்தின் 2ஆம் பாகமான ‘எம்புரான்’ வரும் 27ஆம் தேதி உலகம் முழுவதும் தமிழ், தெலுங்கு, மலையாளம், கன்னடம், ஹிந்தி என ஐந்து மொழிகளில் வெளியாகவுள்ளது. இந்த நிலையில் படத்தின் சுமார் 4 நிமிட ட்ரெய்லர் வெளியாகி, இணையத்தில் வைரல் ஆகி வருகிறது.

‘எம்புரான்’ படத்தில், மோகன்லாலுடன் மஞ்சு வாரியர், டோவினோ தாமஸ், விவேக் ஓபராய், பிரித்விராஜ் உள்பட பலர் நடித்துள்ளனர். முழுக்க முழுக்க அரசியலை மையமாக வைத்து, சுமார் 200 கோடி ரூபாய் பட்ஜெட்டில் உருவாகியுள்ள இந்த படத்தின் ட்ரெய்லரை பார்க்கும்போது, பிரம்மாண்டமான காட்சிகள் மற்றும் மோகன்லாலுக்கு மாஸ் சீன்கள் இருப்பது வெளிப்படையாக தெரிகிறது.

உள்நாட்டில் மட்டுமின்றி, வெளிநாட்டிலும் ஆக்ஷன் காட்சிகள் பிரமாண்டமாக இருக்கின்றன. ட்ரெய்லர் ரசிகர்களை வியக்க வைக்கிறது. முதல்வராக பொறுப்பேற்ற டொவினோ தாமஸ் அரசியல், அவரை பதவியில் வைத்திருக்கும் சூழ்நிலைகள், அதில் இருந்து அவரை நீக்க முயலும் எதிரிகள் இவையனைத்தும் படம் முழுவதும் ஒரு விறுவிறுப்பான அரசியல் கதையாக உருவாக்கப்பட்டுள்ளன என்பதற்கான சுவாரஸ்யமான முன்னோட்டத்தை ட்ரெய்லர் கொடுக்கிறது.

முதல் பாகம் போலவே, இந்த இரண்டாம் பாகமும் நிச்சயம் மிகப்பெரிய வெற்றி அடையும் என எதிர்பார்க்கப்படுகிறது.