వెంకీ సినిమాకి ముహుర్తం కుదిరింది
- IndiaGlitz, [Friday,January 19 2018]
తాజాగా విడుద‌లైన అజ్ఞాత‌వాసి సినిమాలో అతిథి పాత్రలో సందడి చేశారు సీనియ‌ర్ క‌థానాయ‌కుడు విక్టరీ వెంకటేష్. ఇప్పుడు ఆయ‌న క‌థానాయ‌కుడిగా.. ఓ కొత్త చిత్రం సెట్స్ పైకి వెళ్లనుంది. దీనికి సంచ‌ల‌న ద‌ర్శ‌కుడు తేజ దర్శకత్వం వహించ‌నున్నారు.
ఈ సినిమాకి సంబంధించి పూజా కార్యక్రమాలు జరిగి నెల రోజులు కావొస్తున్నా..ఇంతవరకు ఈ సినిమా రెగ్యులర్ షూటింగ్ ప్రారంభించే తేదీని మాత్రం ఖరారు చేయలేదు చిత్ర యూనిట్. తాజాగా జనవరి 26వ తేదీ నుంచి ఈ చిత్రం రెగ్యులర్ షూటింగ్ జరుపుకోనున్నట్లు చిత్ర వర్గాలు వెల్లడించాయి. ఈ వార్తతో ఇటు వెంకీ అభిమానులు, అటు తేజ ఫాన్స్ ఎదురుచూపులకి తెర పడినట్లైంది.
అలాగే ఈ సినిమాకి 'ఆటా నాదే వేటా నాదే' అనే టైటిల్‌ని కూడా కన్ఫర్మ్ చేశారు. సురేష్ ప్రొడక్షన్స్, ఎకె ఎంటర్‌టైన్‌మెంట్స్‌ సంయుక్తంగా నిర్మిస్తున్న ఈ చిత్రానికి.. అనూప్ రూబెన్స్ స్వరాలను అందిస్తున్నారు. ఇక ఈ చిత్రం కోసం.. వెంకీకి జోడీగా ప‌లువురు కథానాయికల పేర్లు పరిశీలించినప్పటికీ...ఇంకా ఎవరిని ఖరారు చేయలేదు.
త్వరలోనే ఈ సినిమాకి సంబంధించి నాయికల వివరాలతో పాటు మరిన్ని విషయాలను చిత్ర బృందం అధికారికంగా వెల్ల‌డిచేయ‌నుంది.