இந்தியா மற்றும் ஆஸ்திரேலியா கிரிக்கெட் அணிகளுக்கு இடையே பிரிஸ்பேன் நகரில் நான்காவது கிரிக்கெட் டெஸ்ட் போட்டி கடந்த 15ஆம் தேதி முதல் நடைபெற்று வருகிறது. இதில் முதல் இன்னிங்சில் ஆஸ்திரேலியா 369 ரன்கள் எடுத்த நிலையில் இந்தியா முதல் இன்னிங்ஸில் 336 ரன்களுக்கு ஆட்டமிழந்தது என்பதும் தற்போது ஆஸ்திரேலிய அணி இரண்டாவது இன்னிங்ஸை விளையாடி வருகிறது என்பதும் தெரிந்ததே

இந்த போட்டியில் முதல் முதலாக டெஸ்ட் போட்டியில் களமிறங்கிய நடராஜன் அபாரமாக பந்துவீசி மூன்று விக்கெட்டுக்களை வீழ்த்தினார். அதுமட்டுமின்றி முதல் முறையாக டெஸ்ட் போட்டியில் பேட்டிங் செய்யும் வாய்ப்பையும் பெற்றார். இந்த போட்டியில் அவர் ஒன்பது பந்துகளை சந்தித்து ஒரே ஒரு ரன் எடுத்தார் என்பது குறிப்பிடத்தக்கது. கடந்த 10 இன்னிங்ஸ்களில் அவர் இப்போது தான் முதல் ரன் எடுத்து ரன் கணக்கை தொடங்கி உள்ளார் என்பது குறிப்பிடத்தக்கது

இதுகுறித்து போட்டி முடிந்ததும் ஜாலியாக நடராஜனுடன் பேசிக் கொண்டிருந்த அஸ்வின் டெஸ்ட் கிரிக்கெட்டில் நீங்கள் 4 ரன்களை அடித்து கணக்கை தொடங்குவீர்கள் என்று நினைத்தேன். மிட்செல் ஸ்டார்க் பந்தை தடுத்து விளையாடி நீங்கள் ஒரு ரன் எடுத்திருக்கிறீர்கள். எப்படி சவுகரியமாக விளையாடினீர்களா? என்று கேட்டபோது நடராஜன் சிரித்து கொண்டே, ‘சவுகரியமாக ஆடினேனா? பால் எனது கண்ணுக்கே தெரியவில்லை அண்ணா’ என்று கூறினார்

அதன் பின்னர், ‘டெஸ்ட் போட்டிகளில் அணியில் இடம் பெற்றது மிகவும் மகிழ்ச்சியாக இருந்தது என்றும் நான் நெட் பவுலராகத்தான் வந்தேன். அதேபோல் நெட் பவுலராகவே திரும்பிச் செல்வேன் என்று தான் நினைத்தேன் என்றும் ஆனால் டெஸ்ட் போட்டி உள்ளிட்ட அனைத்து வகை போட்டிகளிலும் சான்ஸ் கிடைக்கும் என்று நான் எதிர்பார்க்கவே இல்லை என்றும் கூறினார். மேலும் எதிர்பாராமல் நிறைய பேர் காயம் ஆனதால் தான் எனக்கு வாய்ப்பு கிடைத்தது என்றும், ரொம்ப சந்தோஷமாக இருக்கிறது என்றும் நடராஜன் கூறினார். நடராஜன் மற்றும் அஸ்வினின் ஜாலியான இந்த உரையாடலின் வீடியோ தற்போது வைரல் ஆகி வருகிறது

First ball kannuke therla na????❤️ pic.twitter.com/3gwaEPmrWX

— Adheera ?? (@rajini712dhoni) January 17, 2021