ஆரம்பமானது நயன்தாராவின் அடுத்த மெகா பட்ஜெட் படம்
- IndiaGlitz, [Sunday,March 18 2018]
கோலிவுட் திரையுலகின் லேடி சூப்பர் ஸ்டார் நயன்தாரா இளம் நடிகைகளுக்கு போட்டியாக ஒரே நேரத்தில் பல படங்களில் நடித்து பிசியான நடிகையாக உள்ளார். அஜித்தின் விசுவாசம், கமல்ஹாசனின் 'இந்தியன் 2', ரஜினி-கார்த்திக் சுப்புராஜ் படம், ஈரம்' அறிவழகனின் படம், 'அறம் 2' படம் உள்பட பல படங்களில் அவர் நடிக்க வாய்ப்பு இருப்பதாக கருதப்படுகிறது.
இந்த நிலையில் இந்தியாவின் மிகப்பெரிய பட்ஜெட் படங்களில் ஒன்றான 'நரசிம்ம ரெட்டி' படத்தின் படப்பிடிப்பில் நயன்தாரா தற்போது கலந்து கொண்டுள்ளார். இந்த படத்தில் நயன்தாராவின் காட்சிகள் ஐதராபாத்தில் படமாக்க தொடங்கிவிட்டதாக தகவல்கள் வெளிவந்துள்ளன.
பிரிட்டிஷ் அரசை எதிர்த்து போராடிய உய்யலவாடா நரசிம்ம ரெட்டியின் வாழ்க்கை வரலாற்று படமான இந்த படத்தில் மெகா ஸ்டார் சிரஞ்சீவி, பாலிவுட் சூப்பர் ஸ்டார் அமிதாப்பச்சன், ஜெகபதி பாபு, கன்னட சூப்பர் ஸ்டார் கிச்சா சுதீப், மக்கள் செல்வன் விஜய்சேதுபதி உள்ளிட்ட பல பிரபலங்கள் நடிக்கவுள்ளனர். ஆஸ்கார் நாயகன் ஏ.ஆர்.ரஹ்மான் இசையமைக்கவுள்ள இந்த படத்திற்கு ரவிவர்மன் ஒளிப்பதிவு செய்கிறார். பிரமாண்டமாக உருவாகவுள்ள இந்த படத்தை ராம்சரண் தேஜா தயாரிக்கின்றார். இந்த படத்தை சுரேந்தர் ரெட்டி இயக்குகிறார்.