కన్నడ కుమారిగా నిధి
- IndiaGlitz, [Sunday,January 07 2018]
రాజ్‌తరుణ్, హెబ్బా పటేల్ జంటగా నటించిన 'కుమారి 21 ఎఫ్' ఎంతటి ఘనవిజయం సాధించిందో అందరికీ తెలిసిందే. ఈ చిత్రంలోని పాటలు, మాటలు అందర్నీ ఆకట్టుకున్నాయి. ముఖ్యంగా యూత్ ఈ చిత్రానికి బ్రహ్మరథం పట్టింది. సుకుమార్ రైటింగ్స్ నిర్మాణంలో సూర్యప్రతాప్ పల్నాటి ఈ చిత్రానికి దర్శకత్వం వహించారు.
ఇప్పుడీ సినిమా కన్నడంలో అదే టైటిల్‌తో రీమేక్ అయ్యింది. తెలుగులో హెబ్బా చేసిన కుమారి పాత్రను కన్నడలో నిధి కుశలప్ప పోషించారు. రాజ్‌తరుణ్ పాత్రను ప్రణామ్ దేవరాజ్ చేశారు. అవినాష్, మనోజ్, అక్షయ్, రీతేష్ ఇతర కీలక పాత్రల్లో నటించారు. మణిశర్మ తనయుడు సాగర్ మహతి సంగీతం అందించిన ఈ సినిమా ఈ నెల 12న విడుదల కానుంది.
తెలుగులో హెబ్బాకి హీరోయిన్‌గా ఈ సినిమా మంచి పేరు తెచ్చింది. అలాగే తనకు కూడా 'కుమారి 21ఎఫ్' మంచి బ్రేక్ ఇస్తుందని నమ్ముతోంది నిధి. హీరోయిన్‌గా తన రేంజ్ పెరుగుతుందని భావిస్తోంది.