சமீபத்தில் நடைபெற்ற உள்ளாட்சி தேர்தலில் பதிவான வாக்குகள் நேற்று காலை முதல் எண்ணப்பட்டு வரும் நிலையில் விடிய விடிய வாக்கு எண்ணிக்கை நடைபெற்றது. இன்று மாலையுடன் வாக்கு எண்ணும்பணி முடிவடையும் என எதிர்பார்க்கப்படுகிறது. சற்றுமுன் வெளியான தகவலின்படி திமுக, அதிமுக ஆகிய இரண்டு கூட்டணி கட்சிகளும் கிட்டத்தட்ட சம அளவில் வெற்றி பெற்றுள்ளது என்பது குறிப்பிடத்தக்கது.

இந்த நிலையில் திமுக, அதிமுக ஆகிய இரண்டு பெரிய கட்சிகளின் வேட்பாளர்களை சுயேட்சையாக களம் நின்று ரஜினி பட இயக்குனரின் சகோதரர் ஒருவர் வெற்றி பெற்றுள்ளார். ரஜினிகாந்த் நடித்த ‘கபாலி’ மற்றும் காலா உள்பட ஒருசில படங்களை இயக்கிய ரஞ்சித் அவர்களின் சகோதரர் பிரபு என்பவர் சென்னை அருகே உள்ள வில்லிவாக்கம் ஒன்றிய கவுன்சிலர் பதவிக்குப் போட்டியிட்டார்.

தற்போது முடிவுகள் வெளிவந்துள்ள நிலையில் இயக்குனர் பா. ரஞ்சித்தின் சகோதரர் பிரபு 3846 வாக்குகள் பெற்று வெற்றி பெற்றுள்ளார். இவரை எதிர்த்து போட்டியிட்ட திமுக வேட்பாளர் இளம்பருதி 3696 வாக்குகளை மட்டுமே பெற்றதால் பிரபு, 155 வாக்கு வித்தியாசத்தில் வெற்றி பெற்றதாக அறிவிக்கப்பட்டுள்ளது. இந்த வெற்றியை அடுத்து இயக்குனர் பா.ரஞ்சித், அந்த தொகுதிக்கு சென்று தனது சகோதரரின் வெற்றியை கொண்டாடி வருகிறார்.