விமல் நடித்த ’பரமசிவன் பாத்திமா’ என்ற திரைப்படம் விரைவில் வெளியிடப்படும் நிலையில், இந்த படத்தின் டிரைலர் சற்று முன் வெளியாகி, இணையத்தில் வைரலாகி வருகிறது.

விமல் மற்றும் சாயாதேவி முக்கிய வேடத்தில் நடித்துள்ள இந்த படத்தை இசக்கி கார்வண்ணன் தயாரித்து இயக்கியுள்ளார். தீபன் சக்கரவர்த்தி இசையமைத்துள்ள இந்த திரைப்படத்தின் டிரைலர் தற்போது இணையத்தில் பெரும் வரவேற்பை பெற்று வருகிறது.

ஒரு சிறிய கிராமத்தில், ஹிந்து, முஸ்லிம், கிறிஸ்தவர்கள் என மூன்று மத மக்களின் வாழ்க்கை, அவர்களுக்குள் ஏற்படும் மத சண்டைகள் மற்றும் அதனால் எழும் பிரச்சனைகள் தான் இந்த படத்தின் கதையென்று டிரைலரில் இருந்து தெரிய வருகிறது.

விமல் இப்படத்தில் பள்ளி ஆசிரியராக நடித்துள்ளார். எம்.எஸ்.பாஸ்கர் இந்த படத்தில் பாதிரியார் கேரக்டரில் நடித்துள்ளார். இரண்டு நிமிடங்களுக்கு மேல் நீளும் டிரைலரில் இடம்பெற்றுள்ள வசனங்கள், மதச் சண்டைகள் குறித்து விழிப்புணர்வு ஏற்படுத்தும் வகையில் உள்ளன என்பது குறிப்பிடத்தக்கது.

விமலுக்கு இந்த படம் நிச்சயம் ஒரு வெற்றிப் படமாக அமையும் என எதிர்பார்க்கப்படுகிறது.