టాలీవుడ్ పవర్ స్టార్, జనసేన అధినేత పవన్ కల్యాణ్ గురించి ప్రత్యేకించి చెప్పనక్కర్లేదు. ఈయనకు ఫాలోయింగ్ యూత్‌లోనే కాదు.. సినీ ఇండస్ట్రీలో కూడా ఉంటారన్న విషయం తెలిసిందే. అందుకే ఆయన అటు రాజకీయాల్లో.. ఇటు సినిమాల్లో రాణిస్తున్నారు. ఇక అసలు విషయానికొస్తే పవన్ కల్యాణ్ సోషల్ మీడియాలో యమా యాక్టివ్‌గా ఉంటాడన్న సంగతి అందరికీ తెలుసు. ఫేస్‌బుక్, ట్విట్టర్‌లో ఆయనకు పెద్ద ఎత్తున ఫాలోవర్స్ ఉన్నారు. కేవలం ఒక్క ట్విటర్‌లో పవన్‌ను 39 లక్షల మంది అనుసరిస్తున్నారంటే అర్థం చేస్కోండి. ఫాలోవర్స్ సంగతి అటుంచితే పవన్‌ మాత్రం కేవలం 33 మందిని మాత్రమే ఫాలో అవుతున్నాడు. వీరిలో సినీ ఇండస్ట్రీకి చెందిన వారు మాత్రం చాలా తక్కువ మంది మాత్రమే ఉన్నారు.

బాలీవుడ్ బిగ్‌బి అమితాబ్ బచ్చన్, అన్నయ్య చిరంజీవి, రామ్‌చరణ్, సాయిధరమ్ తేజ్‌తో పాటు మరికొందర్ని.. రాజకీయ ప్రముఖులను పవన్ ఫాలో అవుతున్నాడు. అయితే తాజాగా ఆ జాబితాలోకి టాలీవుడ్‌కు ఓ ప్రముఖ సంగీత దర్శకుడు కూడా చేరాడు. ఆయన మరెవరో కాదండోయ్.. ఎస్ఎస్ థమన్. శనివారం నుంచి పవన్‌.. థమన్‌ను ఫాలో అవ్వడం షురూ చేశాడు. ఈ ఇంట్రెస్టింగ్ విషయాన్ని తన ట్విట్టర్ ద్వారా పంచుకున్న థమన్ ఆనందంలో మునిగితేలుతున్నాడు.

వాస్తవానికి పవన్‌కు థమన్ వీరాభిమాని. ఒకానొక సందర్భంలో పవన్‌ సినిమాకు ఒక్కసారైనా పనిచేయాలని ఉందని ఎన్నో రోజులుగా ఈ అవకాశం కోసం వేచి చూస్తున్నట్లు తెలిపాడు. అయితే ‘వకీల్‌సాబ్’తో తన కల నెరవేరిందని అప్పట్లో ట్వీట్ కూడా చేశాడు. అంతేకాదు.. పవన్‌కు సంబంధించిన అన్ని విషయాలను థమన్ ట్విట్టర్‌ ద్వారా పంచుకున్నాడు.

అయితే.. తాజాగా థమన్‌నే పవన్ ఫాలో అవ్వడం విశేషమని చెప్పుకోవచ్చు. పవన్ ఫాలో అయిన అనంతరం తన ట్విట్టర్ వేదికగా ఓ ఇంట్రెస్టింగ్ ట్వీట్ కూడా చేశాడు. ‘ఒక అభిమానిగా ఇది నాకు చాలా గొప్ప విషయం. ఒక రోజుకు ఇంతకంటే గొప్ప ప్రారంభం ఇంకేం కావాలి. చాలా కృతజ్ఞతలు.. లవ్యూ సర్’ అని థమన్ తన ఆనందాన్ని ట్విట్టర్‌లో పంచుకున్నాడు. ఈ ట్వీట్‌ను మెగాభిమానులు, జనసేన కార్యకర్తలు పెద్ద ఎత్తున షేర్లు, కామెంట్ల వర్షం కురిపిస్తున్నారు.