2020.. చాలా కాలం తర్వాత ప్రపంచాన్ని వణికించింది. ఎక్కడికక్కడ స్తంభింపజేసింది. ఈ ఏడాది ఒక్కొక్కరికీ ఒక్కో ఎక్స్‌పీరియన్స్‌ని ఇచ్చింది. ఇక సినీ ప్రపంచం అయితే ఈ మహమ్మారి కారణంగా ఇప్పటికీ కోలుకోలేదు. దీంతో ప్రజానీకం డిజిటల్ ప్రపంచానికి దగ్గరైంది. అయితే ఇటీవలి కాలంలో సినిమాలకు సంబంధించిన ఒక్కొక్క అప్‌డేట్ బయటకు వస్తోంది. దీంతో నెటిజన్లు తమ అభిమాన హీరో సినిమా అప్‌డేట్ కోసం చాలా ఆసక్తిగా సోషల్ మీడియాను ఆశ్రయించారు.

కాగా.. మరికొన్ని రోజుల్లో 2021లో అడుగుపెట్టబోతున్నాం. ఈ సందర్భంగా.. 2020కి సంబంధించిన ట్విట్టర్‌ లెక్కలను ఒక్కొక్కటిగా ట్విట్టర్‌ ఇండియా బయటపెడుతోంది. ఈ క్రమంలోనే ఏ హీరో, హీరోయిన్‌ పేరు బాగా ట్రెండ్‌ అయ్యింది, ఏ సినిమా పేరు టాప్‌ స్థానాన్ని ఆక్రమించిదనే లెక్కలను తాజాగా ట్విట్టర్‌ విడుదల చేసింది. అందులో తెలుగు సినిమా విషయానికి వస్తే.. పవర్‌ స్టార్‌ పవన్‌ కల్యాణ్‌ హీరోగా తెరకెక్కుతున్న 'వకీల్‌సాబ్‌' చిత్రం టాప్‌లో నిలిచింది.

మోస్ట్ ట్విట్‌డ్‌ తెలుగు మూవీ ఇన్‌ 2020గా 'వకీల్‌సాబ్‌' చిత్రం టాప్‌ ప్లేస్‌లో నిలిచినట్లుగా ట్విట్టర్‌ ఇండియా ప్రకటించింది. దీంతో పవన్ అభిమానులు ఫుల్లు ఖుషీలో ఉన్నారు. నిజానికి ‘వకీల్‌సాబ్’కి సంబంధించి ఓ రెండు అప్‌డేట్స్ మినహా ఇప్పటి వరకూ ఇతర అప్‌డేట్స్ ఏమీ రిలీజ్ అవలేదు. ఒక మోషన్ పోస్టర్, ఒక పాటతోనే 'వకీల్‌సాబ్‌' టాప్ స్థానాన్ని కైవసం చేసుకోవడం విశేషం. ఈ చిత్రాన్ని శ్రీ వెంకటేశ్వర బ్యానర్‌లో దిల్ రాజు, బోనీ కపూర్‌లో సంయుక్తంగా నిర్మిస్తున్నారు. వేణు శ్రీరామ్ దర్శకత్వం వహిస్తుండగా.. తమన్ మ్యూజిక్ అందిస్తున్నారు. నివేదా థామస్, అంజలి, అనన్యలు హీరోయిన్లుగా నటిస్తున్నారు.