ప్రకాష్ రాజ్ టీం రెడీ.. అనసూయ, సుడిగాలి సుధీర్, బండ్ల గణేష్..
- IndiaGlitz, [Thursday,June 24 2021]
ప్రకాష్ రాజ్ జోరు చూస్తుంటే మా ఎన్నికల్లో ఈ విలక్షణ నటుడు ఏదో సంచలనమే చేయబోతున్నట్లు అనిపిస్తోంది. మొట్ట మొదటగా అధ్యక్ష పదవి బరిలో నిలిచింది ప్రకాష్ రాజే కావడం విశేషం. ఆ తర్వాత మంచు విష్ణు, జీవిత, హేమ పోటీలో నిలిచారు. మా ఎన్నికల్లో విజయం సాధించేందుకు ప్రకాష్ రాజ్ తన ప్లానింగ్ తో దూసుకుపోతున్నారు.
ఇదీ చదవండి: సూపర్ డూపర్ అంటూ రామ్ ట్వీట్.. లింగుస్వామి మూవీ అప్డేట్!
నాన్ లోకల్ అనే విమర్శలకు ఎదుర్కొంటున్నప్పటికీ ప్రకాష్ రాజ్ ఎక్కడా తగ్గడం లేదు. తాజాగా ప్రకాష్ రాజ్ మరో ముందడుగు వేశారు. మా ఎన్నికల్లో పోటీ చేసే తన ప్యానల్ ని ప్రకటించేశారు. ప్రకాష్ రాజ్ తో సహా మొత్తం 27 మందితో అతడి ప్యానల్ రెడీ అయిపోయింది. ప్రకాష్ రాజ్ తన ప్యానల్ కు సిని'మా' బిడ్డల ప్యానెల్ అని నామకరణం చేశారు.
ఊహించని విధంగా చాలా మంది ప్రముఖుల మద్దతు ప్రకాష్ రాజ్ కు తోడైంది. ప్రకాష్ రాజ్ ప్యానల్ సభ్యులని గమనిస్తే ఆ విషయం అర్థం అవుతుంది. ప్రకాష్ రాజ్ ప్యానల్ లో సీనియర్ నటి జయసుధ, హీరో శ్రీకాంత్, నటుడు బెనర్జీ, సాయి కుమార్, తనీష్, ప్రగతి, యాంకర్ అనసూయ, సన, అనిత చౌదరి , సుధ, అజయ్, నాగినీడు, బ్రహ్మాజీ, రవిప్రకాష్, సమీర్, ఉత్తేజ్, నిర్మాత బండ్ల గణేష్, ఏడిద శ్రీరామ్, శివారెడ్డి, భూపాల్, టార్జాన్, సురేష్ కొండేటి, ఖయ్యుమ్, సుడిగాలి సుధీర్, గోవిందా రావు, శ్రీధర్ రావు సభ్యులుగా ఉన్నారు.
'మా' శ్రేయస్సు దృష్ట్యా, నిర్మాణాత్మక ఆలోచనలని ఆచరణలో పెట్టే దిశగా, నటీనటుల బాగోగుల కోసం సిని'మా' బిడ్డల ప్యానల్ తో రాబోతున్నట్లు ప్రకాష్ రాజ్ తెలిపారు.
మా అధ్యక్ష పదవి కోసం ప్రకాష్ రాజ్, విష్ణు, జీవిత, హేమ పోటీ చేస్తుండగా చిరంజీవి, బాలయ్య, నాగ్, వెంకీ లాంటి సీనియర్ స్టార్స్ మద్దతు ఎవరికి అనేది ఇంకా తేలలేదు. విష్ణు సూపర్ స్టార్ కృష్ణ లాంటి సీనియర్ మోస్ట్ నటుల మద్దతు కోరినట్లు వార్తలైతే వచ్చాయి.