ഗുസ്തി താരങ്ങളെ കാണാൻ എത്തിയ പിടി ഉഷയുടെ വാഹനം തടഞ്ഞു
- IndiaGlitz, [Wednesday,May 03 2023]
ബ്രിജ് ഭൂഷനെതിരെ സമരം ചെയ്യുന്ന ഗുസ്തി താരങ്ങളെ കാണാൻ സമരപ്പന്തലിൽ എത്തിയ ഇന്ത്യൻ ഒളിമ്പിക് അസോസിയേഷൻ അധ്യക്ഷ പിടി ഉഷയുടെ വാഹനം തടഞ്ഞു. ഗുസ്തി താരങ്ങൾക്ക് എതിരായി പിടി ഉഷ നടത്തിയ പ്രസ്താവനയിൽ പ്രതിഷേധിച്ചാണ് വാഹനം തടഞ്ഞത്. സമരം ചെയ്യുന്ന താരങ്ങളെ സന്ദർശിക്കാൻ എന്തുകൊണ്ട് പിടി ഉഷ വൈകി എന്നും വാഹനം തടഞ്ഞ് പ്രതിഷേധിച്ചയാൾ ചോദിച്ചു. ഇയാളെ സുരക്ഷ ഉദ്യോഗസ്ഥർ എത്തി മാറ്റുകയായിരുന്നു.
താരങ്ങൾക്കെതിരെ പി ടി ഉഷ നിലപാട് എടുത്തതിനെ തുടർന്ന് നേരത്തെ വിവാദം ഉയർന്നിരുന്നു. തെരുവിലെ പ്രതിഷേധം രാജ്യത്തിന്റെ പ്രതിഛായക്ക് മങ്ങലേൽപ്പിച്ചു. താരങ്ങൾ പ്രതിഷേധിക്കുകയല്ല വേണ്ടതെന്നും ഒളിമ്പിക് അസോസിയേഷനെ സമീപിക്കണമായിരുന്നു എന്നുമാണ് പി ടി ഉഷയുടെ പരാമർശം ഉണ്ടായത്. പിന്തുണയ്ക്കേണ്ട പിടി ഉഷയുടെ വാക്കുകൾ വേദനിപ്പിച്ചുവെന്ന് ഗുസ്തി താരങ്ങളും അറിയിച്ചിരുന്നു. ഗുസ്തി ഫെഡറേഷൻ അധ്യക്ഷൻ ബ്രിജ് ഭൂഷൺ രാജി വെക്കണമെന്ന ആവശ്യവുമായി ഗുസ്തി താരങ്ങളുടെ സമരം പതിനൊന്നാം ദിനത്തിലേക്ക് പ്രവേശിച്ചിരിക്കുകയാണ്.