తలైవా ఎంట్రీ ఫిక్స్.. జనవరిలో పార్టీ లాంచ్
- IndiaGlitz, [Thursday,December 03 2020]
తమిళ ప్రజలు ఎంతో ఆసక్తిగా ఎదురు చూస్తున్న తరుణం మరికొద్ది రోజుల్లో రాబోతోంది. సూపర్ స్టార్ రజినీకాంత్ రాజకీయాల్లోకి ఎప్పుడు వస్తారు? అసలు వస్తారా.. లేదంటే అనారోగ్య కారణాల కారణంగా ఆగిపోతారా? అనేవి కొంత కాలంగా తమిళ ప్రజల మదిలో మెదులుతున్న ప్రశ్నలు. ఈ ప్రశ్నలన్నింటికీ క్లారిటీ వచ్చేసింది. రజినీ రాజకీయ ఆరంగేట్రం కన్ఫర్మ్ అయిపోయింది. ట్విట్టర్ వేదికగా తన పొలిటికల్ ఎంట్రీని తలైవా ప్రకటించేశారు. డిసెంబర్ 31న పార్టీకి సంబంధించిన వివరాలన్నీ వెల్లడిస్తానని రజినీ ప్రకటించారు. జనవరిలో పార్టీని లాంచ్ చేయనున్నట్టు రజినీ ట్వీట్‌లో వెల్లడించారు.
రజినీకాంత్ ఇటీవల తన అభిమాన సంఘాల నాయకులతో చెన్నైలోని రాఘవేంద్ర కల్యాణ మండపంలో సమావేశమయ్యారు. ఈ సమావేశంలోనే రజనీకాంత్ సొంత పార్టీపై కీలక నిర్ణయం తీసుకున్నట్లు సమాచారం. రాజకీయ ప్రవేశంపై వీలైనంత త్వరలో తన నిర్ణయాన్ని ప్రకటిస్తానని అదే రోజు రజినీ వెల్లడించారు. ఆ సమావేశానంతరం రజినీ మీడియాతో మాట్లాడుతూ.. మక్కల్ మండలం కార్యదర్శులు, నిర్వాహకులు తమ తరుఫు నుంచి లోటుపాట్లను వివరించగా.. తాను సలహాలిచ్చినట్టు వెల్లడించారు. రాజకీయాలపై వీలైనంత త్వరగా నిర్ణయాన్ని ప్రకటిస్తామన్నారు. దీంతో ఆయన రాజకీయ ప్రవేశం గురించిన ప్రకటన నేడు తప్పక వస్తుందని ఆశించిన అభిమానులకు నిరాశ ఎదురైంది.
అయితే సమావేశంలో రజినీ మాట్లాడిన కొన్ని విషయాలు బయటకు వచ్చాయి. జనవరిలో పార్టీ ప్రారంభిస్తే మీరు రెడీగా ఉన్నారా? అని రజినీ నాటి సమావేశంలో అభిమానులను ప్రశ్నించినట్టు తెలుస్తోంది. కొన్ని జిల్లాల అధ్యక్షుల పనితీరు ఏమాత్రం బాగోలేదని పేర్కొన్నట్టు సమాచారం. మీరు కష్టపడితేనే మనం తరువాతి మెట్టు ఎక్కగలమన్నట్టు తెలుస్తోంది. అయితే బీజేపీతో పొత్తు ఉండాలా? వద్దా? అన్న విషయంలో మాత్రం సూపర్ స్టార్ ఓ నిర్ణయానికి ఇంకా రాలేదని సమాచారం. అయితే ఈ సమావేశం జరుగుతుండగానే సమావేశ మందిరం బయట ఉన్న అభిమానులు మాత్రం బీజేపీతో పొత్తు వద్దంటూ నినాదాలు చేయడం గమనార్హం. నాటి అంశాలను పరిగణలోకి తీసుకుంటే రజినీ పొత్తుల జోలికి వెళ్లరని తెలుస్తోంది.