ఒకేసారి నా ప్రయాణాన్ని గుర్తు చేశారు: పవన్
- IndiaGlitz, [Saturday,September 05 2020]
తన పుట్టినరోజు సందర్భంగా శుభాకాంక్షలు చెప్పిన సినీ, మీడియా మిత్రులకు జనసేన అధినేత పవన్ కల్యాణ్ ధన్యవాదాలు తెలిపారు. తన ప్రయాణాన్ని గుర్తు చేసిన వారికి కూడా శుభాకాంక్షలు తెలిపారు. తన సినీ ప్రస్థానం, మైలురాళ్లను ప్రస్తావిస్తూ సాగిన వ్యాసాలు, కథనాలు రాబోతున్న చిత్రాల వివరాలను పాఠకులకు, వీక్షకులకు తెలియజేయడం తననెంతో సంతోషపరిచిందని.. ఒకసారి తన సినీ ప్రస్థానాన్ని గుర్తు చేశారని పవన్ కొనియాడారు.
‘‘సెప్టెంబర్ 2.. నా జన్మదినం సందర్భంగా సినీ, మీడియా మిత్రులెందరో సామాజికి మాధ్యమాల ద్వారా శుభాకాంక్షలు తెలియజేశారు. ప్రింట్, ఎలక్ట్రానిక్ మీడియా సినిమా ఇన్‌చార్జెస్, విలేకరులు, ఫోటో గ్రాఫర్లు, కెమెరామెన్లు, వెబ్ మీడియా నిర్వాహకులు పాత్రికేయులు ప్రత్యేక కథనాల ద్వారా గ్రీటింగ్స్ చెప్పారు. అందరికీ మనస్ఫూర్తిగా నా ధన్యవాదాలు తెలియజేస్తున్నాను. నా సినీ ప్రస్థానం.. మైలురాళ్లను ప్రస్తావిస్తూ సాగిన వ్యాసాలు, కథనాలు, రాబోతున్న చిత్రాల వివరాలను పాఠకులకు, వీక్షకులకు తెలియజేయడం నన్నెంతో సంతోషపరిచింది. ఒకేసారి నా ప్రయాణాన్ని గుర్తు చేశారు.
కష్టాల్లో ఉన్న జనం గళంగా జనసేన నిలుస్తోంది. ప్రజాక్షేత్రంలోనే ఎక్కువ సమయం వెచ్చిస్తున్నాను. సినీ రంగంలో భాగమైన మీడియా మిత్రులు - నేను ప్రజా జీవితంలో ఉన్నా తమవాడిగా భావించి నా అభిమానులకు, సినీ ప్రియులకు కనువిందు చేశారు. నా హితైషులైన సినీ పాత్రికేయులందరికీ మరోసారి హృదయపూర్వక ధన్యవాదాలు తెలుపుకుంటున్నా’’ అని పవన్ పోస్టు పెట్టారు.