'காந்தாரா' இரண்டாம் பாகத்தில் செம ட்விஸ்ட்.. பக்கா பிளான் போடும் ரிஷப் ஷெட்டி!
- IndiaGlitz, [Saturday,January 21 2023]
கடந்த சில மாதங்களுக்கு முன் வெளியான ரிஷப் ஷெட்டியின் 'காந்தாரா’ திரைப்படத்தின் இரண்டாம் பாகம் குறித்த ஆரம்ப கட்ட பணிகள் தொடங்கிவிட்டதாகவும் இதற்காக ரிஷப் ஷெட்டி பக்கா பிளான் போட்டுள்ளதாகவும் தகவல்கள் வெளியாகி உள்ளன.
கடந்த ஆண்டு செப்டம்பர் 30ஆம் தேதி வெளியான 'காந்தாரா’ திரைப்படம் உலகம் முழுவதும் வெளியாகி மிகப்பெரிய வெற்றி பெற்றது என்பதும் ரூபாய் 16 கோடி பட்ஜெட்டில் தயாரிக்கப்பட்ட இந்த படம் உலகம் முழுவதும் ரூ.450 கோடி வரை வசூல் செய்தது என்பது குறிப்பிடத்தக்கது.
இந்திய திரை உலகில் மிக அதிகமான லாபம் சம்பாதித்த படங்களில் ஒன்று என்ற பெருமையைப் பெற்ற 'காந்தாரா’ திரைப்படத்தின் இரண்டாம் பாகம் குறித்த தகவல் தற்போது வெளியாகியுள்ளது.
'காந்தாரா’ படத்தின் கதைக்கு முந்தைய சம்பவங்களை கொண்டு உருவாக்கப்படும் படம் தான் 'காந்தாரா 2’ என்றும் இந்த கதையை தற்போது ரிஷப் ஷெட்டி எழுதி வருவதாகவும் கூறப்படுகிறது. மேலும் இந்த படத்தை முழுக்க முழுக்க காடுகள் மற்றும் கடலோர பகுதிகளில் படமாக்க அவர் பக்கா பிளான் போட்டுள்ளதாகவும், இதற்காக அவர் நேரடியாக அந்தந்த பகுதிகளுக்கு சென்று ஆய்வு செய்து வருவதாகவும் கூறப்படுகிறது. மொத்தத்தில் 'காந்தாரா 2’ திரைப்படம் இந்திய திரை உலகில் மிகப்பெரிய பேசப்படும் படமாக இருக்கும் என்று எதிர்பார்க்கப்படுகிறது.
இந்த படத்தின் படப்பிடிப்பு வரும் ஜூன் மாதம் தொடங்க இருப்பதாகவும் அடுத்த ஆண்டு கோடை விடுமுறையில் இந்த படத்தை ரிலீஸ் செய்ய திட்டமிட்டு இருப்பதாகவும் கூறப்படுகிறது. முதல் பாகத்தில் நடித்த பெரும்பாலான நடிகர்கள் இரண்டாம் பாகத்திலும் நடிக்க வாய்ப்பு இருப்பதாகவும் முழுக்க முழுக்க முதல் பாகத்தில் பணிபுரிந்த டெக்னீசியன்கள் தான் இரண்டாம் பாகத்திலும் பணிபுரிய இருப்பதாகவும் கூறப்படுகிறது. 'காந்தாரா’ படம் போலவே 'காந்தாரா 2’ படமும் மிகப்பெரிய வெற்றி அடையும் என்று எதிர்பார்க்கப்படுகிறது.