కాబోయే భార్య‌ని పరిచయం చేసిన కార్తికేయ.. స్టేజ్‌పైనే మోకాళ్లపై కూర్చొని ప్ర‌పోజ్
- IndiaGlitz, [Sunday,November 07 2021]
ప్రస్తుతం తెలుగు నాట హీరోలు, హీరోయిన్లు ఒకరి తర్వాత ఒకరు పెళ్లిపీటలెక్కుతున్నారు. తాజాగా ఆర్ఎక్స్ 100 చిత్రంతో యూత్‌లో మంచి క్రేజ్ తెచ్చుకున్న యువ హీరో కార్తికేయ. హిట్స్, ఫ్లాప్స్‌‌తో సంబంధం లేకుండా వరుస పెట్టి ప్రాజెక్ట్‌లు పట్టాలెక్కిస్తున్నారు. తాజాగా కార్తికేయ న‌టిస్తున్న చిత్రం ‘‘ రాజా విక్ర‌మార్క ’’. ఈ సినిమాను నవంబర్ 12న విడుదల చేయనున్నారు. ఈ మూవీ ప్రీ రిలీజ్ వేడుక శనివారం హైద‌రాబాద్‌లో జ‌ర‌గగా, ఈ వేడుక‌లో త‌న‌కు కాబోయే భార్య‌ని పరిచయం చేశాడు . నవంబర్ 21న త‌న పెళ్లికి పెద్దలు నిశ్చయించారని.. దీనిలో భాగంగానే తనకి కాబోయే భార్య‌ని వేదిక పైకి పిలిచి పరిచయం చేశాడు. అంతేకాదు అంద‌రిముందూ ప్ర‌పోజ్ చేశాడు.
“‘నా జీవితంలో హీరో కావడానికి ఎంత కష్టపడ్డానో అంత కష్టపడి ఓ అమ్మాయిని ప్రేమించి ఒప్పించుకున్నా. అప్పుడే తనకి నేను హీరో అవుదామని అనుకుంటున్నానని చెప్పి, హీరో అయ్యాక మీ ఇంట్లో వచ్చి అడుగుతా’నని చెప్పా. నేను హీరో అయ్యి… చివరికి ఆ అమ్మాయినే పెళ్లి చేసుకుంటున్నా. ఈ నెల 21న నా పెళ్లి’ అని కార్తికేయ చెప్పుకొచ్చాడు. ఇటీవల నిశ్చితార్థం తర్వాత కార్తికేయ త‌న ప్రేమ, పెళ్లి విష‌యం బహిర్గతం చేసిన సంగతి తెలిసిందే. ఆమె పేరు లోహిత (లోహిత రెడ్డి) అని, (నిట్) వరంగల్‌లో పరిచయమైందని, మొదటి సారి ఆమెను చూసిన క్షణం నుంచి ఇప్పటికీ, ఎప్పటికీ తమ బంధం కొనసాగుతుందని చెప్పుకొచ్చారు.