கமல்-ரஜினி நாயகியின் வாழ்க்கை வரலாறு திரைப்படம்: சாய்பல்லவியுடன் பேச்சுவார்த்தை!
- IndiaGlitz, [Monday,October 12 2020]
கமலஹாசன், ரஜினிகாந்த் உள்பட முன்னணி நடிகர்களின் படங்களில் நாயகியாக நடித்து ஹெலிகாப்டர் விபத்தில் மறைந்த நடிகை ஒருவரின் வாழ்க்கை வரலாறு திரைப்படத்தில் சாய்பல்லவி நடிக்க இருப்பதாக செய்திகள் வெளியாகியுள்ளது.
கமல்ஹாசன் நடித்த ’காதலா காதலா’ ரஜினிகாந்த் நடித்த ’அருணாச்சலம்’ ’படையப்பா’ விஜயகாந்துடன் ‘சொக்கத்தங்கம்’ உள்பட பல திரைப் படங்களில் நாயகியாக நடித்தவர் நடிகை சௌந்தர்யா. பாலிவுட்டிலும் அமிதாப்பச்சனுடன் இவர் ஒரு படத்தில் நடித்துள்ளார் என்பது குறிப்பிடத்தக்கது.
இந்த நிலையில் கடந்த 2004ஆம் ஆண்டு பாரதிய ஜனதா கட்சிக்காக தேர்தல் பிரச்சாரம் செய்த சௌந்தர்யா, ஹெலிகாப்டர் ஒன்றில் சென்றபோது திடீரென விபத்துக்குள்ளாகி மரணம் அடைந்தார். அவரது மறைவு திரையுலகில் பெரும் அதிர்ச்சியை ஏற்படுத்தியது.
இந்த நிலையில் நடிகை சவுந்தர்யாவின் வாழ்க்கை வரலாறு திரைப்படம் ஒன்று உருவாக இருப்பதாகவும் தமிழ் தெலுங்கு ஆகிய மொழிகளில் உருவாகும் இந்த படத்தில் சவுந்தர்யா கேரக்டரில் நடிக்க சாய்பல்லவியிடம் பேச்சுவார்த்தை நடைபெற்று வருவதாகவும் கூறப்படுகிறது.
ஏற்கனவே நடிகை சாவித்திரியின் வாழ்க்கை வரலாறு திரைப்படம் வெளியாகி நல்ல வெற்றியைப் பெற்றது என்பதும் தற்போது முன்னாள் முதல்வர் ஜெயலலிதாவின் வாழ்க்கை வரலாறு திரைப்படம் உருவாகி வருகிறது என்பதும் குறிப்பிடத்தக்கது.