స్టార్ హీరో సల్మాన్‌ఖాన్‌ కథానాయకుడిగా తెరకెక్కుతున్న చిత్రం ‘రాధే: యువర్‌ మోస్ట్‌ వాంటెడ్‌ భాయ్‌’. ప్రభుదేవా దర్శకత్వంలో ఈ చిత్రం తెరకెక్కుతోంది. దిశా పటానీ హీరోయిన్‌గా నటించింది. ఈ చిత్రానికి సంబంధించిన ట్రైలర్ గురువారం విడుదలైంది. మాదక ద్రవ్యాల నేపథ్యంలో ముంబై నగరంలో పెరిగిపోయిన క్రైమ్ రేటును తగ్గించేందుకు ఒక స్పెషల్ ఆఫీసర్‌ ఏం చేశాడనే కథాంశంతో ఈ సినిమా రూపొందింది. ఇటీవలే సినిమా ట్రైలర్ విడుదలై ప్రేక్షకులను విపరీతంగా ఆకట్టుకుంది. సినిమాపై అంచనాలు భారీగానే ఉన్నాయి.

అయితే ఈ సినిమాలో స్టైలిష్ స్టార్ అల్లు అర్జున్ నటించిన ‘దువ్వాడ జగన్నాథం’ చిత్రంలోని సీటీమార్‌ పాటను ఇందులో రీమేక్‌ చేశారు. మామూలుగానే బన్నీ డ్యాన్స్ ఇరగదీస్తాడు. ఇక ఈ మాస్ సాంగ్‌కు స్టెప్స్ అదరగొట్టేశాడేశాడు. దీంతో ఈ పాట తెలుగులో ఎంత సక్సెస్ అయిందో ప్రత్యేకంగా చెప్పనక్కర్లేదు. ఇప్పటికీ ఈ సాంగ్‌కు యూత్ స్టెప్పులేస్తూనే ఉంటుంది. ఇప్పుడు ఈ హిందీ ప్రేక్షకులను సైతం అలరించేందుకు సిద్ధమవుతోంది. ఈ రీమేక్‌ గీతంలో దిశా పటానీ, సల్మాన్‌ వేసిన స్టెప్పులు ప్రత్యేక ఆకర్షణగా నిలిచాయి. గ్లామర్‌ బ్యూటీ, సల్మాన్‌ స్నేహితురాలు జాక్వలైన్‌ ఫెర్నాండెజ్‌ కూడా ఈ పాటలో సందడి చేసింది.

అయితే ‘సీటీ మార్’ ఒరిజినల్ సాంగ్‌ను చూసిన సల్మాన్ అల్లు అర్జున్ స్టెప్పులకు ఫిదా అయిపోయారు. ట్విటర్ వేదికగా బన్నీని ప్రశంసలతో ముంచెత్తారు. ఈ పాటలో బన్నీ చేసిన డ్యాన్స్ అదిరిపోయిందని సల్మాన్ ట్విటర్ ద్వారా ప్రశంసల జల్లు కురిపించారు. ‘‘థాంక్యూ అల్లు అర్జున్.. సీటీమార్’ పాటలో నువ్వు చేసిన పెర్ఫార్మెన్స్ అదిరిపోయింది. నువ్వు డ్యాన్స్ చేసిన విధానం.. నీ స్టైల్, మొత్తంగా సింప్లీ ఫెంటాస్టిక్.. టేక్ కేర్, సేఫ్‌గా ఉండు. లవ్‌ యూ బ్రదర్‌’’ అని సల్మాన్‌ ట్వీట్‌ చేశారు. ‘రాధే’ చిత్రం మే 13న ప్రపంచ వ్యాప్తంగా ప్రేక్షకుల ముందుకు రానుంది.