சமுத்திரக்கனிக்கு கிடைத்த முதல் வெற்றியும் கடைசி சலுகையும்...
- IndiaGlitz, [Tuesday,May 23 2017]
மத்திய அரசு ஜி.எஸ்.டி வரி நடைமுறையை வரும் ஜூலை 1ஆம் தேதி முதல் அமல்படுத்த உள்ளது. எனவே ஜூலை 1ஆம் தேதிக்கு பின்னர் எந்த திரைப்படத்திற்கு வரிவிலக்கு சலுகை என்பது இருக்காது. 28% வரி கட்டியே தீர வேண்டும். இந்த நிலையில் ஜூலை 1ஆம் தேதிக்கு முன்னர் தற்போது ரிலீசுக்கு தயாராக உள்ள திரைப்படங்களை வரிவிலக்கு பெற்று வெளியிட தயாரிப்பாளர்கள் முயற்சித்து வருகின்றனர்.
அந்த வகையில் சமுத்திரக்கனியின் 'தொண்டன்' திரைப்படம் இம்மாதம் 26ஆம் தேதி அதாவது வரும் வெள்ளியன்று வெளியாகிறது. இந்த படத்திற்கு தற்போது தமிழக அரசு 30% வரிவிலக்கு சலுகையை அளித்துள்ளது. சமுத்திரக்கனியின் அடுத்த படம் வெளிவருவதற்குள் ஜிஎஸ்டி அமலாகிவிடும் என்பதால் அனேகமாக வரிச்சலுகை பெறும் சமுத்திரக்கனியின் கடைசி படமாகவும், அதே நேரத்தில் அவருக்கு இந்த படத்தால் கிடைத்த முதல் வெற்றியாகவும் இந்த வரிச்சலுகை பார்க்கப்படுகிறது.
சமுத்திரக்கனி இயக்கி நடித்திருக்கும் இந்த படத்தில் விக்ராந்த், சுனைனா, சூரி, தம்பி ராமையா, கஞ்சா கருப்பு உள்பட பலர் நடித்துள்ளனர். ஜஸ்டின் பிரபாகரன் இந்த படத்திற்கு இசையமைத்துள்ளார்.