கூவத்தூரில் சசிகலா சிறைவைப்பா? பொதுமக்கள் கொந்தளிப்பு
- IndiaGlitz, [Saturday,February 11 2017]
சென்னை ஈசிஆர் அருகே உள்ள கூவத்தூர் சொகுசு ரிசார்ட் ஒன்றில் கடந்த நான்கு நாட்களாக அதிமுக எம்.எல்.ஏக்கள் சிறை வைக்கப்பட்டுள்ளனர். ரிசார்ட்டை சுற்றிலும் சசிகலாவின் ஆட்கள் பாதுகாப்பில் ஈடுபட்டிருப்பதாகவும், அவர்களது அட்டூழியதால் அப்பகுதி கிராமத்து மக்கள் பெரும் பாதிப்பு அடைந்திருப்பதாகவும் கூறப்படுகிறது.
பொதுமக்கள், பள்ளி மாணவ மாணவியர் செல்லும் பாதையை அடைத்து வைத்துக்கொண்டு அந்த பகுதி மக்களுக்கு தொல்லை கொடுத்து வந்ததாக கூறப்படுகிறது. மேலும் இன்று சசிகலா கூவத்தூர் சென்றுள்ளதால் அங்கு குவிக்கப்பட்டிருக்கும் போலீசாரும் பொதுமக்களை அந்த பகுதிக்குள் செல்ல அனுமதிக்காததால் அந்த பகுதி கிராமத்து மக்கள் கொந்தளித்துள்ளனர்.
சசிகலாவும், அதிமுக எம்.எல்.ஏக்களும் உடனடியாக அந்த பகுதியில் இருந்து வெளீயேற வேண்டும் என்றும் இல்லையென்றால் எம்.எல்.ஏக்களை சந்திக்க ரிசார்ட் உள்ளே சென்றுள்ள சசிகலாவையும், அங்கிருக்கும் எம்.எல்.ஏக்களையும் முற்றுகையிட்டு சிறை பிடிப்போம் என்றும் அந்த பகுதி மக்கள் கொந்தளித்துள்ளனர். இதனால் அந்த பகுதியில் அசாதாரண நிலை ஏற்பட்டுள்ளது.