close
Choose your channels

కట్టప్ప కుటుంబంలో విషాదం

Tuesday, December 7, 2021 • తెలుగు Comments

కట్టప్ప కుటుంబంలో విషాదం

సీనియర్ నటుడు సత్యరాజ్‌ ఇంట్లో విషాదం చోటు చేసుకుంది. ఆయన చెల్లెలు కల్పన మండ్రాదియార్‌(66) శనివారం సాయంత్రం కన్నుమూశారు. తమిళనాడు రాష్ట్రం తిరుప్పూర్‌ జిల్లా గాంగేయంలో నివసిస్తున్న కల్పన కొద్దివారాలుగా అనారోగ్యంతో బాధపడుతున్నారు. దీంతో ఆమెను కుటుంబసభ్యులు కోయంబత్తూరులోని ప్రైవేటు ఆస్పత్రిలో చేర్పించి చికిత్స అందించారు. ఈ క్రమంలో కల్పన ఆరోగ్య పరిస్థితి విషమించడంతో శనివారం తుదిశ్వాస విడిచారు. దీంతో సత్యరాజ్‌ కుటుంబం తీవ్ర విషాదంలో మునిగిపోయింది. సత్యరాజ్‌ సోదరి మృతి పట్ల టాలీవుడ్‌, కోలీవుడ్‌ సినీ ప్రముఖులు సంతాపం తెలిపారు.

దక్షిణ భారతదేశంలోని విలక్షణ నటుల్లో సత్య రాజ్ ఒకరు. ముఖ్యంగా తమిళ చిత్ర పరిశ్రమకి చెందిన ఆయన వివిధ భాషల్లోనూ నటించి మంచి నటుడిగా నిరూపించుకున్నాడు. అయితే ఎన్ని సినిమాల్లో నటించినా రాని గుర్తింపు రాజమౌళి దర్శకత్వంలో వచ్చిన బాహుబలితో వచ్చింది. ఈ సినిమాలో కట్టప్పగా సత్యరాజ్.. భారత్‌తో పాటు ప్రపంచ వ్యాప్తంగా మంచి గుర్తింపు సంపాదించుకున్నారు. అంతేకాదు ఆ తర్వాత వరుసగా పలు క్రేజీ ప్రాజెక్ట్‌ల్లో ప్లేస్ కొట్టేశారు.

కట్టప్ప కుటుంబంలో విషాదం

తొలి నాళ్లలో విలన్‌గా నటించిన సత్యరాజ్ .. 1985లో కార్తిక్ రఘునాథ్ రూపొందించిన ‘సావి’ చిత్రంలో తొలిసారి హీరోగా నటించారు. ఆ తర్వాత నడిగమ్, బ్రమ్మ, రిక్షామామ, కళ్యాణ గలాట్టా, సుయంవరమ్, మలబార్ పోలీస్” వంటి చిత్రాలు మంచి ఆదరణ పొందాయి. హీరోగా తన ప్రభ తగ్గుతున్నట్లు గ్రహించిన సత్యరాజ్ వెంటనే సపోర్టింగ్ యాక్టర్‌గా మారిపోయారు. ఆయనకు ఇద్దరు పిల్లలు. కూతురు దివ్య, తనయుడు సిబిరాజ్. తండ్రిలాగే సిబిరాజ్ సైతం నటనలో అడుగుపెట్టాడు. సత్యరాజ్ “లీ, నాయిగల్ జాకిరతై, సత్య” వంటి చిత్రాలను నిర్మించారు. ‘విల్లాది విలన్’ అనే చిత్రానికి దర్శకత్వం కూడా నిర్వహించారు.

Follow @ Google News: గూగుల్ న్యూస్ పేజీలోని ఇండియాగ్లిట్జ్ తెలుగు వెబ్‌సైట్‌ను అనుసరించడానికి మరియు వెంటనే వార్తలను తెలుసుకోవడాని ఇక్కడ క్లిక్ చేయండి.   

Get Breaking News Alerts From IndiaGlitz