தளபதி விஜய் நடித்து வரும் 'தளபதி 63' படத்தின் படப்பிடிப்பு விறுவிறுப்பாக நடைபெற்று வரும் நிலையில் சமீபத்தில் சென்னை மற்றும் கொல்கத்தா அணிகளுக்கு இடையிலான போட்டி சென்னை சேப்பாக்கம் மைதானத்தில் நடந்தபோது, சென்னை வந்திருந்த நடிகர் ஷாருக்கான், அட்லியின் அலுவலகத்திற்கு சென்றார் என்பது தெரிந்ததே.

இதனையடுத்து ஷாருக்கான், 'தளபதி 63' படத்தில் ஒரு முக்கிய கேரக்டரில் நடிப்பார் என்றும், அல்லது 'மெர்சல்' இந்தி ரீமேக்கில் நடிப்பார் என்று கூறப்பட்டது. ஒருசிலர் இந்த சந்திப்பு மரியாதை நிமித்தமானது என்றும், 'தளபதி 63' படத்தில் ஷாருக்கான் நடிப்பது என்பது வதந்தி என்றும் கூறினர். ஆனால் தற்போது நம்பத்தகுந்த வட்டாரங்களில் இருந்து வெளிவந்துள்ள செய்தியின்படி இந்த வதந்தி இன்று உண்மையாகியுள்ளது. ஆம், 'தளபதி 63' படத்தில் ஷாருக்கான் தான் மெயின் வில்லன் என்று கூறப்படுகிறது.

இந்த படத்தின் கிளைமாக்ஸ் காட்சிகளுக்கு மட்டுமே பத்து முதல் பதினைந்து நிமிட காட்சிகளில் ஷாருக்கான் தோன்றவுள்ளதாகவும், ஷாருக்கான் சம்பந்தப்பட்ட காட்சிகளின் படப்பிடிப்பு மும்பை மற்றும் சென்னையில் நடைபெறும் என்றும் கூறப்படுகிறது. ஷாருக்கான் இந்த படத்தில் இணைவதால் இந்த படத்தின் வட இந்திய உரிமையின் வியாபாரம் மிகப்பெரிய அளவில் நடைபெற வாய்ப்பு உள்ளது என்பதும் குறிப்பிடத்தக்கது. இருப்பினும் இதுகுறித்த அதிகாரபூர்வ தகவல் வெளிவரும் வரை பொறுமை காப்போம்.