தென்னிந்தியா என்ன வேற்று கிரகமா? ஸ்ருதிஹாசனின் காட்டமான பதில்!
- IndiaGlitz, [Thursday,February 10 2022]
தென்னிந்தியாவிலிருந்து வந்த நீங்கள் எப்படி சரளமாக இந்தி பேசுகிறீர்கள் என்ற கேள்விக்கு தென்னிந்தியா என்ன வேற்றுக்கிரகமா? என நடிகை ஸ்ருதிஹாசன் பதிலடி கொடுத்துள்ள தகவல் தற்போது வெளிவந்துள்ளது.
உலக நாயகன் கமல்ஹாசனின் மூத்த மகள் ஸ்ருதிஹாசன் நடிகை, இசையமைப்பாளர், பாடகி என பல்வேறு அவதாரங்களில் தமிழ், தெலுங்கு, ஹிந்தி திரையுலகில் வலம் வந்து கொண்டிருக்கிறார் என்பது தெரிந்ததே. இந்த நிலையில் சமீபத்தில் தனது தங்கை மற்றும் காதலருடன் மும்பையில் நிகழ்ச்சி ஒன்றில் கலந்து கொண்டார்.
அப்போது அவர் பேசியபோது, ‘தன்னிடம் ஒருவர் தென்னிந்தியாவிலிருந்து வந்த நீங்கள் எப்படி ஹிந்தி பேசுகிறீர்கள்? என்று கேட்டதாகவும் அதற்கு நான், ‘தென்னிந்தியா என்ன வேற்று கிரகமா? என்று பதில் அளித்ததாகவும் கூறியுள்ளார். மேலும் நாம் அனைவரும் படம் எடுக்கிறோம், கடுமையாக உழைக்கிறோம், இதில் தென்னிந்தியா வட இந்தியா என பாகுபாடு எதற்கு? என்றும் அவர் கேள்வி எழுப்பினார். மேலும் 2022ஆம் ஆண்டில் பாரபட்சம் பார்க்க எங்களுக்கு நேரமில்லை என்றும் அவர் காட்டமாக கூறியுள்ளார்.
திரையுலகில் கடந்த பல ஆண்டுகளாக தென் இந்தியா, வட இந்தியா என்ற பாகுபாடு இருந்துவரும் நிலையில் ஸ்ருதிஹாசனின் இந்த பதில் தக்க பதிலடியாக அமைந்துள்ளது என நெட்டிசன்கள் கருத்து தெரிவித்து வருகின்றனர்.