மணிரத்னம் படத்தில் இசையமைப்பாளராக அறிமுகமாகும் பிரபல பாடகர்
- IndiaGlitz, [Tuesday,July 09 2019]
இயக்குனர் மணிரத்னம் படத்தில் இசையமைப்பாளராக அறிமுகமான ஏ.ஆர்.ரஹ்மான் இன்று உலகம் போற்றும் இசையமைப்பாளராக இருந்து வருகிறார் என்பது அனைவரும் அறிந்ததே. இந்த நிலையில் அவருடைய அடுத்த படத்தில் பிரபல பாடகர் சித் ஸ்ரீராம் இசையமைப்பாளராக அறிமுகமாகவுள்ளார்.
மணிரத்னம் இயக்கவுள்ள 'பொன்னியின் செல்வன்' என்ற பிரமாண்டமான திரைப்படத்தின் ஆரம்பகட்ட பணிகள் ஒருபுறம் நடந்து கொண்டிருக்கும் நிலையில் அவருடைய தயாரிப்பில் 'வானம் கொட்டட்டும்' என்ற திரைப்படம் உருவாகவுள்ளது. மணிரத்னம் கதை-திரைக்கதையில் உருவாகும் இந்த படத்தை அவருடைய உதவியாளர் தனசேகரன் இயக்கவுள்ளார்.
விக்ரம்பிரபு, ஐஸ்வர்யா ராஜேஷ், மடோனா செபாஸ்டியன், சரத்குமார், ராதிகா, உள்ளிட்ட பலர் நடிக்கவுள்ள இந்த படத்தில்தான் பாடகர் சித் ஸ்ரீராம் இசையமைப்பாளராக அறிமுகமாகவுள்ளார். ஏ.ஆர்.ரஹ்மான், அனிருத், டி.இமான் உள்பட பல முன்னணி இசையமைப்பாளர்களின் இசையில் பாடல்களை பாடியவர் பாடகர் சித்ஸ்ரீராம் என்பது குறிப்பிடத்தக்கது.