ரஜினி, கமல் படங்களில் ஒரே நேரத்தில் நடிக்கும் பிரபல ஹீரோ!
- IndiaGlitz, [Friday,January 24 2020]
ஒரே நேரத்தில் ஒரு நடிகர் அல்லது நடிகை அஜித்-விஜய் படங்களில் நடிப்பதும், கமல்-ரஜினி படங்களில் நடிப்பதும் தலைப்புச் செய்தியாக இடம் பெறும் என்பது தெரிந்ததே. இந்த நிலையில் உலக நாயகன் கமல்ஹாசன் நடித்து வரும் ’இந்தியன் 2’ படத்தில் முக்கிய வேடத்தில் நடித்து வரும் நடிகர் சித்தார்த் சூப்பர் ஸ்டார் ரஜினிகாந்த் நடித்து வரும் ’தலைவர் 168’ படத்திலும் நடிக்க இருப்பதாக வெளிவந்த செய்தி அனைவரையும் ஆச்சரியப்படுத்தியுள்ளது.
’தலைவர் 168’ படத்தின் படப்பிடிப்பு தற்போது விறுவிறுப்பாக நடைபெற்று வரும் நிலையில் இந்த படத்தில் ரஜினிக்கு ஜோடியாக மீனா மற்றும் குஷ்பு நடித்து வருவதாக கூறப்படுகிறது. இந்த நிலையில் இந்த படத்தில் கீர்த்தி சுரேஷ் ரஜினியின் மகள் அல்லது தங்கையாக நடித்து வருவதாக கூறப்படுகிறது.
இந்த நிலையில் கீர்த்தி சுரேஷுக்கு ஜோடியாக சித்தார்த் நடிக்க இருப்பதாகவும் இது குறித்த அதிகாரப்பூர்வ அறிவிப்பு விரைவில் வெளிவரும் என்று தெரிகிறது. இந்த செய்தி உறுதி செய்யப்பட்டால் ஒரே நேரத்தில் ரஜினி மற்றும் கமல் படங்களில் நடிக்கும் பிரபல ஹீரோ என்ற பெருமை சித்தார்த்துக்கு கிடைக்கும் என்பது குறிப்பிடத்தக்கது.