நடிகர் சிம்பு நடிப்பில் வெற்றிமாறன் இயக்கவிருக்கும் திரைப்படம் குறித்த தகவல்கள் அவ்வப்போது வெளிவந்து கொண்டிருக்கின்றன. இந்த நிலையில், இந்த படத்தில் நடிக்கும் நட்சத்திரங்கள் குறித்த தகவல்கள் தற்போது கசிந்து இணையத்தில் பரபரப்பை ஏற்படுத்தியுள்ளன.

வெற்றிமாறன் இயக்கத்தில் சூர்யா நடிப்பதாக இருந்த 'வாடிவாசல்' திரைப்படம் கைவிடப்பட்டதாக கூறப்படும் நிலையில், சிம்பு நடிக்கவிருக்கும் படத்தைத்தான் வெற்றிமாறன் அடுத்ததாக இயக்க இருக்கிறார் என்று செய்திகள் வெளியாகியுள்ளன. இந்த படம் குறித்த அதிகாரப்பூர்வ அறிவிப்பு இந்த வாரம் வெளியாகும் என்றும், இன்னும் சில வாரங்களில் படப்பிடிப்பு தொடங்கும் என்றும் கூறப்படுகிறது.

இந்த நிலையில், இந்த படத்தில் நடிக்கும் நட்சத்திரங்கள் குறித்த தகவல் தற்போது கசிந்துள்ளது. இயக்குனர் நெல்சன் மற்றும் நடிகர் கவின் ஆகிய இருவரும் இந்த படத்தில் சிறப்பு தோற்றத்தில் நடிக்க இருப்பதாகவும், இந்த படத்தின் நாயகியாக ஆண்ட்ரியா நடிக்க இருப்பதாகவும் தெரிகிறது. அதுமட்டுமின்றி, சமுத்திரக்கனி இந்த படத்தில் ஒரு முக்கிய கதாபாத்திரத்தில் நடிக்க இருப்பதாகவும், அநேகமாக இந்த படம் ராஜன் வகையறா குறித்த கதையம்சம் கொண்டதாக இருக்கும் என்றும் கூறப்படுகிறது.

வடசென்னையை மையமாக கொண்ட கதையம்சத்தில் இந்த படம் உருவாக இருப்பதாகவும், இந்த படத்தை குறுகிய காலத்தில் முடிக்க வெற்றிமாறன் திட்டமிட்டு இருப்பதாகவும் தகவல்கள் தெரிவிக்கின்றன.