நடிகர் திலகம் சிவாஜி கணேசன் நடித்த படத்தில் நாயகியாக நடித்த இலங்கை சேர்ந்த நடிகை காலமான நிலையில், அவருக்கு திரையுலகினர் இரங்கல் தெரிவித்து வருகின்றனர்.

சிவாஜி கணேசன் நடித்த 'பைலட் பிரேம்நாத்’ என்ற திரைப்படம் 1978 ஆம் ஆண்டு வெளியானது. அந்த படத்தில் நாயகியாக நடித்து மக்கள் மத்தியில் பிரபலமானவர் நடிகை மாலினி பொன்சேகா. இலங்கையின் "ராணி" என்று அழைக்கப்படும் இவர், நேற்று காலமானார்.

புற்றுநோய் காரணமாக கடந்த சில நாட்களாக மருத்துவமனையில் சிகிச்சை பெற்று வந்த நிலையில், சிகிச்சை பலனின்றி உயிரிழந்ததாக அவரது குடும்பத்தினர் அறிவித்துள்ளனர்.

இலங்கை திரைப்படத் துறையில் தனது நடிப்பை தொடங்கிய மாலினி, ’பைலட் பிரேம்நாத்’ என்ற படத்தின் மூலம் தான் தமிழில் அறிமுகமானார். அதன் பிறகு, ‘யார் அவள்’ ‘மல்லிகை மோகினி’, ’பனிமலர்’ உள்ளிட்ட திரைப்படங்களில் நடித்தார்.

கடந்த 2010 ஆம் ஆண்டு, இலங்கையில் ஐக்கிய மக்கள் சுதந்திர கூட்டணியின் சார்பில் நாடாளுமன்ற உறுப்பினராக நியமிக்கப்பட்டிருந்தார்.

இந்த நிலையில், மறைந்த மாலினியின் உடல், நாளை அரசு மரியாதையுடன் இறுதிச்சடங்கு நடைபெறும் என்று அறிவிக்கப்பட்டுள்ளது.

சினிமா பிரபலங்கள் மற்றும் அரசியல் தலைவர்கள், அவரது மறைவுக்கு இரங்கலை தெரிவித்து வருகின்றனர்.