சிவகார்த்திகேயனின் 'டான்' வசூல்: தமிழ் சினிமா இதுவரை செய்யாத சாதனை!
- IndiaGlitz, [Friday,September 02 2022]
தமிழ் சினிமாவில் இதுவரை எந்த படமும் செய்யாத வசூல் சாதனையை சிவகார்த்திகேயன் நடிப்பில் சிபி சக்கரவர்த்தி இயக்கத்தில் உருவான ’டான்’ படத்தின் வசூல் சாதனை செய்துள்ளது என்ற தகவல் பெரும் ஆச்சரியத்தை ஏற்படுத்தியுள்ளது.
சிவகார்த்திகேயன் நடித்த ’டான்’ திரைப்படம் கடந்த மே 13ஆம் தேதி வெளியாகி மிகப்பெரிய வரவேற்பு பெற்றது என்பதும் இந்த படம் ஒரு சில நாட்களில் 100 கோடி வசூலைத் தாண்டியது என்பதும் தெரிந்ததே.
இந்த நிலையில் இந்த படத்தின் மொத்த வசூல் 130 கோடி என தற்போது அதிகாரப்பூர்வமாக அறிவிக்கப்பட்டுள்ளது. ஏற்கனவே ரஜினி, கமல், விஜய், அஜித் போன்ற பெரிய நடிகர்கள் நடித்த பல திரைப்படங்கள் 100 கோடி முதல் 400 கோடி வரை வசூல் செய்து இருந்தாலும் ‘டான்’ திரைப்படத்தின் ரூ.130 கோடி வசூல் என்பது இதுவரை தமிழ் சினிமாவில் எந்த படமும் செய்யாத ஒரு புதிய சாதனையை செய்துள்ளது.
அதாவது ஒரு அறிமுக இயக்குனரின் முதல் திரைப்படமே 100 கோடி ரூபாய் வசூல் செய்தது ‘டான்’ திரைப்படம் தான் என்பதுதான் அந்த சாதனை. இந்த சாதனைக்கு பரிசாக இயக்குனர் சிபிசக்கரவர்த்திக்கு அடுத்த படமே சூப்பர் ஸ்டார் ரஜினிகாந்த் நடிக்கும் ’தலைவர் 170’ என்ற படத்தை இயக்கும் வாய்ப்பு கிடைத்துள்ளது என்பதும் இந்த படத்தையும் ‘டான்’ திரைப்படத்தை தயாரித்த லைகா நிறுவனமே தயாரிக்கவுள்ளது என்பது குறிப்பிடத்தக்கது.