శిష్యుడికి ఉప్పెనంత ప్రేమతో!: సుకుమార్
- IndiaGlitz, [Tuesday,February 16 2021]
శిష్యుడు ప్రయోజకుడై మంచి స్థాయికి చేరుకుంటే ఆ గురువు కంటే సంతోషించేవారు ఎవరూ ఉండరు. వాడు నా శిష్యుడంటూ చెప్పుకుంటున్నప్పుడు ఆ గురువు కళ్లల్లో ఓ మెరుపు మెరుస్తుంది. గర్వంతో తనువు ఉప్పొంగుతుంది. ప్రస్తుతం అదే సంతోషాన్ని దర్శకుడు సుకుమార్ అనుభవిస్తున్నారు. రీసెంట్‌గా విడుదలైన 'ఉప్పెన' చిత్రం బాక్సాఫీస్‌ వద్ద సునామీని సృష్టిస్తోన్న విషయం తెలిసిందే. హీరో, హీరోయిన్‌, దర్శకుడికి ఇది తొలి చిత్రమే అయినా.. బ్లాక్‌బస్టర్‌ టాక్‌తో.. ఈ సినిమా కలెక్షన్ల వర్షం కురిపిస్తోంది. ఈ చిత్రానికి దర్శకత్వం వహించింది సుక్కు శిష్యుడు బుచ్చిబాబు సానా అన్న విషయం అందరికీ తెలిసిందే.
బుచ్చిబాబు, బ్రిలియంట్ డైరెక్టర్ సుకుమార్ దగ్గర దర్శకత్వ శాఖలో శిక్షణ పొందారు. సుకుమార్ తరహాలోనే ‘ఉప్పెన’ రూపంలో ఓ విభిన్నమైన, సాహసోవంతమైన, అందమైన ప్రేమకథను ఓ ప్రేమకావ్యంలా మలిచారు. ఈ చిత్రం ప్రేక్షకుల ఆదరణ.. వసూళ్ల సునామీతో దూసుకుపోతుంది. దీంతో సుక్కు ఆనందానికి అవధుల్లేకుండా పోయాయి. బుచ్చిబాబు తనపెద్ద కొడుకు అని.. తాను పుత్రోత్సాహంలో ఉన్నానని వేదికపై ఇప్పటికే సుక్కు చెప్పేశారు. తాజాగా తన ఆనందాన్ని వ్యక్తం చేస్తూ బుచ్చిబాబుకు ప్రేమతో సుక్కు రాసిన ఓ లేఖ సోషల్‌మీడియాలో వైరల్‌గా మారింది. బుచ్చిబాబు తనను గురువును చేసేసరికి తాను తిరిగి శిష్యుడినైపోయానంటూ సుక్కు రాసిన లేఖ ఆకట్టుకుంటోంది.
‘‘నువ్వు నన్ను గురువును చేసే సరికి... నాకు నేను శిష్యుడినై పోయాను. ఇంత గొప్ప సినిమా తీయడానికి నువ్వు నా దగ్గర ఏం నేర్చుకున్నావా...? అని.. నాకు నేను శిష్యుడిని అయిపోతే తప్ప అదేంటో తెలుసుకోలేను. నాలోకి నన్ను అన్వేషించుకునేలా చేసిన సానా బుచ్చిబాబును ఉప్పెనంత ప్రేమతో అభినందిస్తూ.. ఇట్లు సుకుమార్ ఇంకో శిష్యుడు - సుకుమార్’’ అంటూ సకుమార్ రాసిన ఈ లేఖ అందరిని అలరిస్తుంది. ఓ శిష్యుడి పట్ల గురువుగారి ప్రేమను చూసి అందరూ సుకుమార్‌పై ప్రశంసల వర్షం కురిపిస్తున్నారు. అంతేకాదు ఓ శిష్యుడిని దర్శకుడిగా చూడాలనే తపన, అతని సినిమా కోసం ఓ గురువు ప్రేమ, ఇదంతా సినీ పరిశ్రమలో చాలా అరుదు అంటూ ఈ గురు శిష్యుల గురించి అంతా చర్చించుకుంటున్నారు.