சன் டிவியில் ஒளிபரப்பாகிய ’சுந்தரி’ சீரியலில் நடித்த நடிகருக்கு திருமணம் நடைபெற இருக்கிறது. இதனை அவரது ரசிகர்கள் அறிந்து, வாழ்த்துக்களை தெரிவித்து வருகின்றனர்.

’சுந்தரி’ தொடரில் நெகட்டிவ் கதாபாத்திரத்தில் நடித்த ஜிஷ்ணு மேனன், கேரளாவை சேர்ந்தவர். இவர் செலிபிரிட்டி மேக்கப் ஆர்டிஸ்ட் அபியாதிராவை கடந்த சில ஆண்டுகளாக காதலித்த நிலையில், தற்போது இருவருக்கும் திருமணம் நிச்சயமாகியுள்ளது.

பல சின்னத்திரை நட்சத்திரங்களுக்கு மேக்கப் கலைஞராக பணிபுரிந்தவர் அபியா திரா. அதுமட்டுமின்றி மேக்கப் தொடர்பான வகுப்புகளையும் நடத்தி வருகிறார். ’சுந்தரி’ தொடரிலும் ஜிஷ்ணுவின் மேக்கப் கலைஞராக இவரே பணிபுரிந்துள்ளார். சில ஆண்டுகளாக காதலித்து வந்த இருவருக்கும், இரு தரப்பு பெற்றோர்களின் சம்மதத்துடன் திருமண நிச்சயதார்த்தம் நடைபெற்றுள்ளதாக தெரிகிறது. விரைவில் இவர்களது திருமண தேதி அறிவிக்கப்படும் என எதிர்பார்க்கப்படுகிறது.

இந்த நிலையில், சன் டிவியில் விரைவில் வெளியாக இருக்கும் புதிய தொடர் ஒன்றில் ஜிஷ்ணு கதாநாயகனாக நடிக்க இருப்பதாக தகவல் வெளியாகியுள்ளது. மேலும், அவருக்கு ஜோடியாக ரேஷ்மா நடிக்க இருப்பதாகவும் கூறப்படுகிறது. இந்த தொடர் இன்னும் சில வாரங்களில் சன் டிவியில் தொடங்கவுள்ளதாக தகவல் வெளியாகியுள்ளது.