క్రైమ్ కామెడీ జోన‌ర్‌తో సునీల్?
- IndiaGlitz, [Sunday,March 25 2018]
కామెడీ హీరో సునీల్ హిట్ చిత్రాలలో ఒకటిగా నిలిచిన చిత్రం 'పూలరంగడు'. ఈ చిత్రాన్ని వీరభద్రమ్‌ చౌదరి తెరకెక్కించారు. ల్యాండ్ మాఫియా నేపథ్యంలో తెరకెక్కిన ఈ చిత్రంలో సునీల్ కామెడీతో పాటు యాక్షన్ స‌న్నివేశాల్లో కూడా బాగా న‌టించారు.
ఈ చిత్రం కోసం ఎంతో శ్రమించి.. ఆరుపలకల శరీర సౌష్టవాన్ని కూడా ట్రై చేశారు సునీల్. 2012లో విడుదలైన ఈ చిత్రం మంచి విజయం సాధించింది. ఆరు సంవత్సరాల విరామం త‌రువాత.. మళ్ళీ సునీల్, వీరభద్రమ్‌ కాంబినేషన్‌లో మరో సినిమా రాబోతోంది.
గత చిత్రంలో యాక్షన్ కామెడీను పంచిన ఈ ద్వయం ఈసారి క్రైమ్ కామెడీ జోనర్‌లో సినిమా చేయబోతున్నట్టు వార్తలు వినిపిస్తున్నాయి. ఈ నేపథ్యంలో వీరభద్రమ్‌ ఓ కథను సిద్ధం చేసుకుని సునీల్‌కు వినిపించడం.. అది సునీల్‌కి నచ్చడంతో త్వరలో ఈ క్రైమ్ స్టోరీ పట్టాలెక్కనుంది.
అయితే.. ప్రస్తుతం కథకి తుది మెరుగులు దిద్దేప‌నిలో ఉన్నారు డైరెక్ట‌ర్‌. అంజి రెడ్డి ప్రొడక్షన్స్ పతాకంపై అంజి రెడ్డి నిర్మిస్తున్న ఈ చిత్రం.. ప్రీ-ప్రొడక్షన్ పనులు జరుపుకుంటోంది. దీనికి సంబంధించి త్వరలో మరిన్ని విషయాలు వెలువడే అవకాశం ఉంది. ఎప్పటినుంచో విజయం కోసం ఎదురుచూస్తున్న సునీల్.. ఈ క్రైమ్ కామెడీ జోనర్‌తోనైనా విజయాన్ని అందుకుంటారేమో చూడాలి.