சூர்யா நடிப்பில், வெற்றிமாறன் இயக்கத்தில் உருவாக இருக்கும் ’வாடிவாசல்’ படத்தின் படப்பிடிப்பு விரைவில் தொடங்கும் என்று கூறப்பட்ட நிலையில், சமீபத்தில் பேட்டி அளித்த தயாரிப்பாளர் கலைப்புலி தாணு அவர்கள், இந்த படத்தின் ரிலீஸ் தகவல் குறித்து அறிவிப்பை வெளியிட்டுள்ளார்.

கடந்த சில வாரங்களுக்கு முன்னர், வெற்றிமாறனும் நானும் சூர்யா தம்பியை அவரது வீட்டிற்கு சென்று சந்தித்தோம். இந்த சந்திப்பில் எந்தெந்த தேதியை ஒதுக்குவது குறித்து பேச்சுவார்த்தை நடத்தினோம். அதன் பிறகு, வெற்றிமாறனை தனியாக சந்தித்த சூர்யா, எந்தெந்த தேதியில் படப்பிடிப்பு வைத்துக் கொள்ளலாம் என்பது குறித்து ஆலோசனை செய்தார்.

அதுமட்டுமின்றி, வெற்றிமாறனும் ஜிவி பிரகாஷும் சந்தித்து, ஒரு பாடலை கம்போஸ் செய்து ஒலிப்பதிவும் முடித்துவிட்டனர். இதனை அடுத்து, படப்பிடிப்பு தொடங்கும் நாளும் திட்டமிடப்பட்டுவிட்டது.

அடுத்த ஆண்டு ஏப்ரல்-மே மாதத்தில், இந்த படத்தை ரிலீஸ் செய்ய திட்டமிட்டு இருக்கிறோம் என்று கலைப்புலி தாணு கூறியுள்ளார். இந்த தகவல் ரசிகர்களுக்கு உற்சாகத்தை ஏற்படுத்தியுள்ளது.

சூர்யா தற்போது, ஆர். ஜே. பாலாஜி இயக்கத்தில் உருவாகி வரும் ’சூர்யா 45’ படத்தில் நடித்து வருகிறார். இந்த படத்தின் படப்பிடிப்பு முடிந்தவுடன், ’வாடிவாசல்’ படத்தில் இணைந்து கொள்வார் என்று எதிர்பார்க்கப்படுகிறது.