టాలీవుడ్‌లో గత కొన్ని రోజులుగా జరిగిన పరిణామాలపై సీనియర్ నటుడు, టీడీపీ ఎమ్మెల్యే నందమూరి బాలకృష్ణ చేసిన వ్యాఖ్యలు సినీ పరిశ్రమలో ప్రకంపనలు రేపుతున్న విషయం తెలిసిందే. ఈ వ్యాఖ్యలపై ఇప్పటికే పలువురు ప్రముఖులు స్పందించగా.. తాజాగా సినిమాటోగ్రఫి మంత్రి తలసాని శ్రీనివాస యాదవ్ స్పందించారు.

‘అసలు బాలకృష్ణ అలా ఎందుకు మాట్లాడారో నాకు తెలియదు. ఆయన ఏమన్నారో చూసిన తర్వాతే నేను స్పందిస్తాను. ఆ విజువల్స్ అన్నీ పాతవి ఇప్పటివి కాదని కొందరు అంటున్నారు. అసలు ఏం జరిగిందో నేను తెలుసుకుంటాను. చర్చలకు సినీ పరిశ్రమకు చెందిన సీనియర్ నటులు, నిర్మాతలు, దర్శకులు వచ్చారు. సినిమా, టీవీ షూటింగులకు సంబంధించే ఆ సమావేశంలో చర్చించాం తప్ప మిగతా విషయాలేమీ మాట్లాడలేదు. ఇండస్ట్రీలో యాక్టివ్‌గా ఉన్న వారిని సమావేశానికి పిలిచామని తెలిపారు. ఇండస్ట్రీ మొత్తాన్ని పిలిచి సమావేశం పెట్టమన్నా నాకు ఎలాంటి అభ్యంతరం లేదు. అసలు విషయాలన్నీ చర్చించిన తర్వాత ముఖ్యమంత్రి కేసీఆర్‌కు అన్ని విషయాలను వివరిస్తాను’ అని మంత్రి తలసాని చెప్పుకొచ్చారు.