'தளபதி 69' படத்தில் முதலமைச்சராக நடிக்கிறாரா விஜய்? டைட்டில் இதுதானா?
- IndiaGlitz, [Sunday,March 03 2024]
தளபதி விஜய் நடிக்க இருக்கும் கடைசி திரைப்படம் என்று கூறப்படும் ’தளபதி 69’ படத்தை இயக்கும் இயக்குனர்கள் குறித்த தகவல்கள் அவ்வப்போது இணையத்தில் கசிந்து வருகிறது என்பதை பார்த்து வருகிறோம். அட்லி, ஹெச் வினோத், கார்த்திக் சுப்புராஜ், ஆர்ஜே பாலாஜி, திரிவிக்ரம் உட்பட பல இயக்குனர்கள் ’தளபதி 69’ படத்தை இயக்க வாய்ப்பிருப்பதாகவும் இதில் விஜய் யாரை தேர்வு செய்யப் போகிறார் என்பது மில்லியன் டாலர் கேள்வியாக உள்ளது என்பதும் குறிப்பிடத்தக்கது.
இந்த நிலையில் ’தளபதி 69’ படத்தை இயக்குவது அட்லி என கடந்த சில மணி நேரங்களாக சமூக வலைதளத்தில் ஒரு செய்தி பரவி வருகிறது. ஏற்கனவே தனியார் தொலைக்காட்சி நிகழ்ச்சி ஒன்றில் கலந்து கொண்ட அட்லியிடம் தளபதி விஜய் முதலமைச்சர் ஆக நடிக்கும் ஒரு படத்தை நீங்கள் இயக்கினால் அந்த படத்திற்கு என்ன டைட்டில் வைப்பீர்கள் என்று கேட்டபோது ’ஆளப்போறான் தமிழன்’ என்ற டைட்டில் வைப்பேன் என்று அட்லீ கூறியிருந்தார்.
அந்த வகையில் சமீபத்தில் அட்லி, விஜய்யை சந்தித்து முதலமைச்சர் கேரக்டர் ஹீரோவாக உள்ள கதையை கூறியதாகவும் அந்த கதை விஜய்க்கு பிடித்து விட்டதால் ’தளபதி 69’ படம் இதுதான் என்றும் கூறப்பட்டு வருகிறது. மேலும் இந்த படத்தில் விஜய் ஜோடியாக சமந்தா நடிக்க இருப்பதாகவும் அனிருத் இசையமைக்க இருப்பதாகவும் சன் பிக்சர்ஸ் நிறுவனம் இந்த படத்தை தயாரிக்க இருப்பதாகவும் கூறப்படுகிறது,.
ஏற்கனவே டிவிவி என்ற தெலுங்கு திரைப்பட நிறுவனம் தான் ’தளபதி 69’ படத்தை தயாரிக்க இருப்பதாக கூறப்பட்ட நிலையில் தற்போது சன் பிக்சர்ஸ் பெயரும் சமூக வலைதளங்களில் வைரல் ஆகி வருகிறது. இது போன்ற பல செய்திகள் அவ்வப்போது வந்து கொண்டிருந்தாலும் ’தளபதி 69’ படத்தின் அதிகாரப்பூர்வ அறிவிப்பு வந்தால் மட்டுமே தயாரிப்பு நிறுவனம், இயக்குனர், மற்றும் இசையமைப்பாளர், நட்சத்திரங்கள் குறித்த தகவல் உறுதி செய்யப்படும் என்பது குறிப்பிடத்தக்கது.