இயக்குனர் இமயம் பாரதிராஜாவின் மகன் மனோஜ் பாரதிராஜா திடீரென ஏற்பட்ட மாரடைப்பால் நேற்று காலமான நிலையில், அவரது மறைவு ஒட்டுமொத்த தமிழ் திரை உலகை அதிர்ச்சியடைய செய்துள்ளது.

இந்த நிலையில், மனோஜ் உடல் அவரது நீலாங்கரை இல்லத்தில் வைக்கப்பட்டுள்ள நிலையில், அங்கு ஏராளமான திரையுலகினர் மற்றும் ரசிகர்கள் அஞ்சலி செலுத்தி வருகின்றனர். அந்த வகையில் தளபதி விஜயின் வீடு நீலாங்கரையில் இருப்பதால், தன்னுடைய வீட்டில் இருந்து மனோஜ் உடல் வைக்கப்பட்டுள்ள வீட்டிற்கு நடந்தே சென்று நேரில் அஞ்சலி செலுத்தினார்.

இது குறித்த புகைப்படங்கள் இணையத்தில் வைரல் ஆகி வருகின்றன. மேலும், விஜய்யுடன் அவரது நெருங்கிய நண்பரான சஞ்சய் நடந்து சென்றார் என்பது குறிப்பிடத்தக்கது.

இந்த நிலையில், விஜய்க்கு மத்திய அரசின் ஒய் பிரிவு பாதுகாப்பு அளிக்கப்பட்டுள்ளதை அடுத்து, அவருக்கு போலீசார் பாதுகாப்பு அளித்தனர் என்பதும், அவர் அஞ்சலி செலுத்திய வீட்டில் இருந்து திரும்பும் வரை அவரது பாதுகாப்பை கவனித்துக் கொண்டனர் என்பதும் குறிப்பிடத்தக்கது.

பாரதிராஜா இயக்கத்தில் இதுவரை விஜய் ஒரு படத்திலும் நடித்ததில்லை என்றாலும், மனோஜ் மற்றும் விஜய் நெருங்கிய நண்பர்கள் என்று திரையுலகம் கூறி வருகின்றது.