சூர்யா நடித்த ‘ரெட்ரோ’ திரைப்படத்தில் நாயகியாக நடித்துள்ள பூஜா ஹெக்டேவுக்கு ஒரு வசனம் கூட இல்லை என்ற தகவல் ஆச்சரியத்தை ஏற்படுத்தியுள்ளது. இந்த படத்தின் டீசரை கூர்ந்து கவனித்திருந்தால் கூட இந்த உண்மை தெரிந்திருக்கும் என்று நெட்டிசன்கள் கூறி வருகின்றனர்.

சூர்யா நடிப்பில், கார்த்திக் சுப்புராஜ் இயக்கத்தில் உருவாகியுள்ள ‘ரெட்ரோ’ படத்தின் படப்பிடிப்பு முடிவடைந்து, தற்போது தொழில்நுட்ப பணிகள் விறுவிறுப்பாக நடைபெற்று வருகிறது. மே ஒன்றாம் தேதி, தொழிலாளர் தினத்தில், இந்த படம் உலகம் முழுவதும் பிரமாண்டமாக வெளியாகவுள்ளது. இதற்கான ப்ரோமோஷன் பணிகளும் தொடங்கிவிட்டன.

இந்நிலையில் சமீபத்தில் வெளியான இந்த படத்தின் டீசரில், சூர்யா-பூஜாவின் ரொமான்ஸ் காட்சிகள் இடம் பெற்றிருந்தன. அவை ரசிகர்கள் மத்தியில் நல்ல வரவேற்பை பெற்றது. இந்த நிலையில், திரைப்படத்தில் நாயகி பூஜா, பேச முடியாத கதாபாத்திரத்தில் நடித்திருக்கிறார் என்று கூறப்படுகிறது.

அதனால் தான் டீசரில், 'என்னை கல்யாணம் பண்ணிக்கிறியா?' " என்று சூர்யா கேட்கும் போது, பூஜா பதிலளிக்காமல், சூர்யாவின் நெற்றியில் முத்தமிட்டு, தலையை மட்டும் ஆட்டுகிறார். படம் முழுவதும் அவருக்கு வசனம் இல்லை என்ற தகவல் ரசிகர்கள் மத்தியில் ஆச்சரியத்தை ஏற்படுத்தியுள்ளது.

ஆனால், அதே நேரத்தில், பூஜா இதுவரை இல்லாத அளவில் மிகவும் பர்ஃபெக்ஷன் ஆக நடித்துள்ளார் என்று படக்குழுவினர்கள் பாராட்டியுள்ளனர் என்பது குறிப்பிடத்தக்கது.