ఒకే రోజున ముగ్గురు స్టార్ హీరోల వాయిస్ ఓవ‌ర్స్‌
- IndiaGlitz, [Wednesday,February 14 2018]
ఒక స్టార్ హీరో సినిమాకి మరో స్టార్ హీరో, ఒక స్టార్ డైరెక్టర్ సినిమాకి మరో స్టార్ హీరో వాయిస్ ఓవర్ ఇస్తే!?...ఈ రెండు కూడా గతంలో 'జల్సా', 'మర్యాద రామన్న' సినిమాలో చూసాం. మళ్ళీ ఇలాంటి మ్యాజిక్ రిపీట్ కాబోతోంది.. ఈ శుక్రవారం (ఫిబ్రవరి 16) విడుదల కానున్న 'మనసుకు నచ్చింది', 'అ!' సినిమాలతో. ఈ రెండు సినిమాలు కూడా కొత్త దర్శకులు తెరకెక్కించిన చిత్రాలే కావడం విశేషం.
"మనసుకు నచ్చిన పని చేయండి" అంటూ మంజుల ఆమె మనసుకు నచ్చిన దర్శకత్వ బాధ్యతను స్వీకరించి 'మనసుకు నచ్చింది' సినిమాని తెరకెక్కించారు. మనిషి జీవితం యాంత్రికంగా మారిందంటూ, ప్రకృతితో కలిసి ప్రయాణిస్తే....చాలా విషయాలు తెలుస్తాయని, సరిగ్గా ఇటువంటి విషయాలనే ఈ సినిమాలో చూపించడం జరిగిందని ఆమె ఇటీవల మీడియాకి తెలియజేసారు. ఇప్పటిదాకా విడుదలైన టీజర్, ట్రైలర్లలో ఈ విషయాన్నే ప్రస్తావించారు కూడా. అలాగే ఈ సినిమాలో ప్రకృతికి వాయిస్ ఓవర్ ఇచ్చారు సూపర్ స్టార్ మహేష్ బాబు.
ఇక నాని మొదటిసారి నిర్మిస్తున్న చిత్రం 'అ!'. ప్రశాంత్ వర్మ దర్శకుడిగా పరిచయం కానున్నారు. ఈ సినిమాలో స్టార్ కాస్టింగ్ తో పాటు ఒక చేప, బోన్సాయ్ చెట్టు కూడా కీలక పాత్రలు పోషిస్తున్నాయి. చేప పాత్ర‌కి నాని, బోన్సాయ్ చెట్టు పాత్ర‌కి రవితేజ వాయిస్ ఓవర్ ఇవ్వడం సినిమాపై అంచనాలు పెంచేశాయి. అలాగే ఈ రెండు సినిమాలు ఆయా స్టార్ నటుల సొంత నిర్మాణ సంస్థలు (రవితేజ మినహా) కావడం విశేషం. మరి ఈ రెండు చిత్రాలు ప్రేక్షకులను ఏ మేర అలరిస్తాయో చూడాలి.