தாயின் கர்ப்பத்திற்குள் சண்டை போட்ட இரட்டையர்கள்: வைரலாகும் வீடியோ!
- IndiaGlitz, [Wednesday,April 17 2019]
ஒரே தாய்க்கு பிறந்த அண்ணன் - தம்பி, அக்கா - தங்கை சண்டை போடுவது என்பது வாடிக்கையான ஒன்றுதான். ஏன் இரட்டையர்களாக பிறந்தாலும் அவர்களுக்குள் சண்டை வருவது சகஜம் தான். ஆனால் தாயின் கர்ப்பத்தில் இருக்கும்போதே ஒரு இரட்டையர்கள் சண்டை போட்ட வீடியோ தற்போது உலகம் முழுவதும் வைரலாகி வருகிறது.
சீனாவை சேர்ந்த 28 வயது பெண் ஒருவர் நிறைமாத கர்ப்பிணியாக இருந்தார். அவருக்கு இரட்டை குழந்தை பிறக்கவுள்ளது ஏற்கனவே தெரிந்திருதது. இந்த நிலையில் குழந்தையின் வளர்ச்சி குறித்து அறிய அவர் ஸ்கேன் எடுக்க மருத்துவமனைக்கு சென்றார். இந்த ஸ்கேனை பார்த்த அந்த பெண்ணும், அவரது கணவரும் ஆச்சரியம் அடைந்தனர்.
ஏனெனில் அந்த பெண்ணின் வயிற்றில் நன்கு வளர்ச்சியடைந்த இரட்டை பெண் குழந்தைகள் ஒன்றுடன் ஒன்று சண்டை போட்டும், ஒருவரை ஒருவர் தள்ளி விளையாடி கொண்டும் இருந்தது. சண்டை போடுவது மட்டுமின்றி அன்பினால் ஒருவரை ஒருவர் அணைத்து கொள்ளும் காட்சிகளும் இந்த ஸ்கேனில் இருந்து தெரிய வந்தது.
இந்த ஸ்கேன் வீடியோவை பார்த்ததும் மகிழ்ச்சி அடைந்த பெற்றோர்கள், மருத்துவர்களின் அனுமதியுடன் அந்த வீடியோவை வாங்கி தங்கள் சமூக வலைத்தளத்தில் பதிவு செய்தனர். இந்த வீடியோவிற்கு இதுவரை 25 லட்சம் லைக்ஸ்களும், 80 ஆயிரம் கமெண்ட்டுகளும் கிடைத்துள்ளது.
பிறக்கும் முன்னரே செர்ரி, ஸ்டிராபெரி என பெயர் வைத்துள்ள இந்த குழந்தையின் பெற்றோர்கள் இருவரும் பிறக்கும் தினத்தை ஆவலுடன் எதிர்பார்த்து காத்திருக்கின்றனர்.