உலக கோப்பை கிரிக்கெட் போட்டி கடந்த சில நாட்களாக விறுவிறுப்பாக நடைபெற்று வருகிறது என்பதும் இந்த போட்டியில் இதுவரை இரண்டு போட்டிகளில் விளையாடிய இந்திய அணி இரண்டிலும் வெற்றி பெற்றுள்ளது என்பதும் தெரிந்ததே.

இந்த நிலையில் அடுத்ததாக இந்தியா மற்றும் பாகிஸ்தான் அணிகளுக்கு இடையிலான போட்டி அகமதாபாத் மைதானத்தில் வரும் 14ஆம் தேதி நடைபெற உள்ளது. இந்த போட்டியை காண்பதற்காக இரண்டு சூப்பர் ஸ்டார்கள் நேரில் மைதானத்திற்கு செல்ல உள்ளதாக தகவல் வெளியாகி உள்ளன.

உலக கோப்பை கிரிக்கெட் போட்டியை பார்ப்பதற்காக பிசிசிஐ சில பிரபலங்களுக்கு கோல்டன் டிக்கெட் கொடுத்துள்ளது. அந்த வகையில் கோல்டன் டிக்கெட் பெற்றுள்ள சூப்பர் ஸ்டார் ரஜினிகாந்த் மற்றும் பாலிவுட் சூப்பர் ஸ்டார் அமிதாப்பச்சன் ஆகிய இருவரும் இந்த போட்டியை நேரில் காண இருக்கின்றனர்.

மேலும் அமிதாப்பச்சன் மற்றும் ரஜினிகாந்த் ஆகிய இருவரும் ’தலைவர் 170’ படத்திலும் இணைந்து நடிக்க உள்ள நிலையில் இருவரும் இணைந்து இந்த போட்டியை பார்க்கும் புகைப்படங்கள் இணையத்தில் வைரலாகும் என்று எதிர்பார்க்கப்படுகிறது.

இந்த நிலையில் தற்போது ’தலைவர் 170’ படத்தின் படப்பிடிப்பு நெல்லை அருகே உள்ள கிராமத்தில் விறுவிறுப்பாக நடைபெற்று வருகிறது என்பது குறிப்பிடத்தக்கது.