உதயநிதியின் அடுத்த பட ரிலீஸ் தேதி அறிவிப்பு!
- IndiaGlitz, [Saturday,December 21 2019]
அரசியல் பணிகளில் பிசியாக இருந்தபோதிலும் நடிகர் உதயநிதி ஸ்டாலின் தற்போது மிஷ்கின் இயக்கத்தில் ‘சைக்கோ’, கே.எஸ்.அதியமான் இயக்கத்தில் ‘ஏஞ்சல்’ மற்றும் மகிழ்திருமேனி இயக்கும் ஒரு படம் என பிசியாக நடித்து வருகிறார்.
இந்த நிலையில் மிஷ்கின் இயக்கத்தில் உதயநிதி நடித்த த்ரில்லர் படமான ‘சைக்கோ’ திரைப்படத்தின் படப்பிடிப்பு மற்றும் போஸ்ட் புரடொக்சன்ஸ் பணிகள் முடிவடைந்து இந்த படம் டிசம்பர் 27ஆம் தேதி வெளியாகவுள்ளதாக அறிவிக்கப்பட்டது. இதனை உதயநிதியும் தனது சமூக வலைத்தளத்தில் உறுதி செய்தார்.
ஆனால் தற்போது வந்துள்ள புதிய தகவலின்படி இந்த படத்தின் ரிலீஸ் தேதி ஜனவரி 24ஆம் தேதிக்கு ஒத்திவைக்கப்படுகிறது. ஜனவரி 10ல் ரஜினியின் ‘தர்பார்’ திரைப்படமும், ஜனவரி 16ல் தனுஷின் ‘பட்டாஸ்’ திரைப்படமும் வெளிவரவுள்ள நிலையில் ஜனவரி 24ல் உதயநிதியின் ‘சைக்கோ’ ரிலீஸ் ஆகிறது என்பது குறிப்பிடத்தக்கது.
பார்வையற்ற மாற்றுத்திறனாளி வேடத்தில் உதயநிதி நடித்திருக்கும் இந்த படத்தில் நித்யாமேனன் மற்றும் அதிதிராவ் ஹைதி ஆகிய இரண்டு நாயகிகள் நடித்துள்ளனர். மிரளவைக்கும் இசைஞானியின் இசையில் தன்விர்மிர் ஒளிப்பதிவில், அருண்குமார் படத்தொகுப்பில் உருவாகியுள்ள இந்த படத்தை டப்புள்மீனிங் புரடொக்சன்ஸ் நிறுவனம் தயாரித்துள்ளது.