பிரபல குணச்சித்திர நடிகை கமலா காமேஷ் இறந்துவிட்டதாக சில ஊடகங்கள் மற்றும் சமூக வலைதளங்களில் செய்திகள் வெளியான நிலையில், அதற்கு மறுப்பு தெரிவித்துள்ளார் அவரது மகள் உமா ரியாஸ். உண்மையில் இறந்தது யார் என்பதையும் அவர் விளக்கம் அளித்துள்ளார்.

தமிழ் திரையுலகில், பாரதிராஜா இயக்கிய "அலைகள் ஓய்வதில்லை" என்ற திரைப்படத்தில் கார்த்திக் அம்மாவாக அறிமுகமானவர் நடிகை கமலா காமேஷ். "சம்சாரம் அது மின்சாரம்" உட்பட பல திரைப்படங்களில் அம்மா கதாபாத்திரத்தில் நடித்துள்ள நிலையில், இன்று காலை அவர் காலமானதாக செய்திகள் வெளியானது.

இந்த நிலையில், கமலா காமேஷின் மகளும் நடிகையுமான உமா ரியாஸ்கான் இது குறித்து விளக்கம் அளித்துள்ளார். தனது அம்மா கமலா காமேஷ் இறந்ததாக வந்த தகவல் தவறானது என்றும், அவர் நல்ல உடல் நலத்துடன் இருக்கிறார் என்றும் கூறியுள்ளார்.

ஆனால் அதே நேரத்தில், தன்னுடைய கணவரின் அம்மா ரசீதா பானு என்பவர்தான் இறந்துள்ளார் என்றும், கடந்த சில மாதங்களாக அவர் உடல் நலக் குறைவாக இருந்த நிலையில் இன்று காலை அவர் உயிரிழந்தார் என்றும் தெரிவித்துள்ளார்.

உமா ரியாஸ், மாமியார் இறந்ததை அவருடைய அம்மா கமலா காமேஷ் இறந்ததாக தவறுதலாக புரிந்து கொண்டு செய்திகள் பதிவாகியுள்ளது என்பது இந்த விளக்கத்தின் மூலம் தெரிய வந்துள்ளது.