நேரடியாக நெட்பிளிக்ஸில் ரிலீஸாக்கும் வெங்கட்பிரபுவின் அடுத்த படம்!
- IndiaGlitz, [Tuesday,December 17 2019]
பிரபல இயக்குனர் வெங்கட்பிரபு தயாரிப்பில் இயக்குனர் சரவணராஜன் என்பவர் இயக்கிய 'ஆர்.கே.நகர்' என்ற திரைப்படம் கடந்த பல மாதங்களுக்கு முன்னரே படப்பிடிப்பு மற்றும் தொழில்நுட்ப பணிகள் முடிவடைந்து ரிலீசுக்கு தயார் நிலையில் இருந்தது. இருப்பினும் இந்த படத்தின் ரிலீஸ் தேதி ஒருசில முறை அறிவிக்கப்பட்டு அந்த தேதியில் ரிலீஸ் செய்ய முடியாமல் போனது
இந்த நிலையில் இந்த படம் தற்போது நேரடியாக ‘நெட்பிளிக்ஸில்’ ரிலீஸ் ஆகவிருப்பதாக அறிவிக்கப்பட்டுள்ளது. இதுகுறித்த விளம்பரங்களும் தற்போது ‘நெட்பிளிக்ஸில்’ வெளிவந்து கொண்டிருக்கின்றது என்பது குறிப்பிடத்தக்கது. இதேபோல் எதிர்காலத்தில் இன்னும் பல திரைப்படங்கள் நேரடியாக டிஜிட்டலில் ரிலீஸ் ஆனாலும் ஆச்சரியப்படுவதற்கில்லை.
வைபவ், சனா அல்தாப், சம்பத்ராஜ், அஞ்சனா கிர்த்தி, சந்தான பாரதி, சுப்பு பஞ்சு, பிரேம்ஜி, கருணாகரன் உள்பட பலர் நடித்துள்ள இந்த படத்திற்கு பிரேம்ஜி அமரன் இசையமைத்துள்ளார். கோபி அமர்நாத் ஒளிப்பதிவில், பிரவீண் கே.எல் படத்தொகுப்பில் உருவாகியுள்ள இந்த படம் ஒரு அரசியல் நையாண்டி படம் என்பது குறிப்பிடத்தக்கது.