கடந்த டிசம்பர் 2019 ஆம் ஆண்டு தோன்றிய கொரோனா வைரஸ் பாதிப்பு இன்றும் வரை சற்றும் குறையாமல் அச்சுறுத்தலை ஏற்படுத்தி வருகிறது. இந்நிலையில் கடந்த ஆண்டு முதல் அலையின்போது ஏற்படுத்திய கொரோனா வைரஸின் மரபணு பின்னர் பிரிட்டன், பிரேசில், தென் ஆப்பிரிக்கா, இந்தியா எனப் பல இடங்களில் உருமாற்றம் அடைந்து பெரும் அச்சுறுத்தலை ஏற்படுத்தியது. இதில் தென் ஆப்பிரிக்காவில் தோன்றிய கொரோனா வைரஸின் மரபணு மட்டும் 7 விதமாக உருமாற்றம் அடைந்ததாக விஞ்ஞானிகள் அச்சம் தெரிவித்து இருந்தனர்.

இந்நிலையில் தற்போது வியட்நாமில் புதிதாக உருமாற்றம் அடைந்த கொரோனா வைரஸ் கண்டுபிடிக்கப்பட்டு உள்ளது. மேலும் இது பிரிட்டன் வகையில் இருந்து உருமாற்றம் அடைந்து இருக்கலாம் என்றும் மற்ற வைரஸ்களை விட இந்த வைரஸ் காற்றில் அதிவேகமாகப் பரவும் தன்மைக் கொண்டது என்றும் விஞ்ஞானிகள் அச்சம் தெரிவித்து உள்ளனர்.

உலகில் முதல் முதலான சீனாவில்தான் கொரோனா வைரஸ் கண்டுபிடிக்கப்பட்டது. இந்த நாட்டுடன் நேரடியாக எல்லையைப் பகிர்ந்து கொள்ளும் வியட்நாமில் கடந்த ஆண்டு வரை வெறும் 270 பாதிப்புகள் மட்டுமே கண்டறியப்பட்டன. காரணம் சீனாவோடு இருந்த தொடர்பை முதலில் துண்டித்துக் கொண்ட வியட்நாம் அடுத்ததாக உலகத் தொடர்புகளில் இருந்தும் தன்னைத் துண்டித்துக் கொண்டது.

மேலும் 9.5 கோடி மக்கள் தொகை கொண்ட இந்த நாட்டில் கொரோனா வைரஸ் பரவுவதற்கு முன்பே ஊரடங்கு விதிகள் கடுமையாக்கப்பட்டன. இதனால் பாதிப்புகளை முழுமையாகக் குறைத்து உலகிற்கே வியட்நாம் ஒரு பெரும் எடுத்துக் காட்டாக திகழ்ந்தது. இந்நிலையில் கடந்த ஏப்ரல் மாதத்தில் இருந்து வியட்நாமில் புதிதாக 3,600 பேருக்கு கொரோனா வைரஸ் பாதிப்பு ஏற்பட்டு இருக்கிறது. இதனால் அந்நாட்டின் மொத்த பாதிப்பு 7,168 ஆகவும் உயிரிழப்பு 42 ஆகவும் பதிவாகி உள்ளது.

இதற்கு முக்கிய காரணம் வியட்நாமில் தற்போது காற்றில் அதிவேகமாகப் பரவும் புதுவகை உருமாறிய கொரோனா வைரஸ் பரவி வருகிறது. இதனால் அந்நாட்டில் புது அச்சுறுத்தல் ஏற்பட்டு இருப்பதாக அந்நாட்டு சுகாதாரத்துறை அச்சம் தெரிவித்து வருவதும் குறிப்பிடத்தக்கது. மேலும் தென்ஆப்பிரிக்காவில் பரவிய கொரோனா வைரஸ் 7 விதமாக உருமாற்றம் அடைந்தது போலவே வியட்நாமில் தற்போது பரவிவரும் உருமாறிய கொரோனா வைரஸில் 7 வேரியேஷன்ஸ் கண்டுபிடிக்கப்பட்டு இருப்பதும் குறிப்பிடத்தக்கது.