சூப்பர் ஸ்டார் ரஜினிகாந்த் நடித்த ‘ஜெயிலர்’ திரைப்படம் நேற்று வெளியாகி பாசிட்டிவ் விமர்சனங்களை பெற்று வருவது மட்டுமின்றி வசூலிலும் சாதனை செய்து வருகிறது. இந்த படம் உலகம் முழுவதும் ஒரே நாளில் ரூ.80 கோடிக்கும் அதிகமாக வசூல் செய்துள்ளதாகவும் இந்த படம் தமிழ் திரை உலகில் ஒரு மிகப்பெரிய வசூல் சாதனை செய்யும் என்றும் கூறப்படுகிறது. சினிமா ரசிகர்கள் மட்டுமின்றி திரையுலக பிரபலங்கள் இந்த படத்தை கொண்டாடி வருகின்றனர்

இந்த நிலையில் ‘ஜெயிலர்’ படத்தின் வெற்றியை அடுத்து நடிகர் விஜய், இயக்குனர் நெல்சனை தொலைபேசியில் அழைத்து தனது வாழ்த்துக்களை தெரிவித்துள்ளதாக செய்திகள் வெளியாகி உள்ளன

விஜய் நடிப்பில் நெல்சன் இயக்கத்தில் ’பீஸ்ட்’ என்ற படம் உருவாகிக் கொண்டிருந்த போது தான் ‘ஜெயிலர்’ திரைப்படத்தின் வாய்ப்பு நெல்சனுக்கு கிடைத்தது. அப்போது விஜய் தான் அவரை ஊக்கப்படுத்தி ரஜினியிடம் கதை சொல்லுங்கள் என்றும் கண்டிப்பாக இந்த படத்தை இயக்கும் வாய்ப்பு உங்களுக்கு கிடைக்கும் என்றும் ஊக்கமளித்தார். இதை ‘ஜெயிலர்’ இசை வெளியீட்டு விழாவில் நெல்சன் கூறியிருந்தார்.

இந்த நிலையில் ‘ஜெயிலர்’ திரைப்படம் நேற்று வெளியாகி வெற்றி பெற்றிருக்கும் நிலையில் நெல்சனை தொலைபேசியில் அழைத்து விஜய் தனது வாழ்த்துக்களை தெரிவித்துள்ளார் என்பது குறிப்பிடத்தக்கது.