విజయ్ సేతుపతి.. వివాదం
- IndiaGlitz, [Sunday,January 17 2021]
మక్కల్‌ సెల్వన్‌.. విలక్షణ నటుడు విజయ్ సేతుపతి పుట్టినరోజు నేడు( జనవరి 16). సోషల్‌ మీడియా వేదికగా ఆయనకు పుట్టినరోజు శుభాకాంక్షలు వెల్లువెత్తాయి. ఈ సంక్రాంతికి విజయ్‌తో ఆయన కలిసి నటించిన మాస్టర్‌ ఆయనకు చాలా మంచి పేరుని కూడా తెచ్చి పెట్టింది. అంతా హ్యాపీ కదా! అని అనుకుంటున్న సమయంలో ఆయన చేసిన ఓ పని వల్ల విజయ్ సేతుపతి విమర్శలను ఎదుర్కొన్నాడు. ఇంతకీ విజయ్ సేతుపతి ఎందుకు విమర్శలను ఎదుర్కొన్నాడనే వివరాల్లోకి వెళితే.. ప్రస్తుతం విజయ్ సేతుపతి 'పొన్రం' సినిమాలో నటిస్తున్నాడు. ఈ సినిమా సెట్స్‌లో విజయ్ సేతుపతి పుట్టినరోజు వేడుకలు జరిగాయి. ఇందులో కేక్‌లో చాకుతో కాకుండా పెద్ద కత్తితో కట్‌ చేశాడు మన మక్కల్‌ సెల్వన్‌ . అయితే ఈ చర్యను కొందరు తప్పు పట్టారు. రౌడీ, గూండాలా కత్తితో కేక్‌ కట్‌ చేయడమేంటని విమర్శించారు. ఈ ఫొటోలు నెట్టింట వైరల్‌గా మారాయి.
అయితే తనపై వస్తున్న విమర్శలకు విజయ్‌సేతుపతి వివరణను ఇచ్చుకున్నాడు. తాను ప్రస్తుతం నటిస్తోన్న 'పొన్రం' సినిమాలో కత్తి కీలక పాత్ర పోషిస్తుందని, అందువల్ల ఆ కత్తితో కేక్‌ను కట్‌ చేశానే తప్ప, మరో ఉద్దేశం లేదని, కేక్‌ను అలా కట్‌ చేసినందుకు క్షమాపణలు చెబుతున్నానని చెప్పాడు విజయ్ సేతుపతి. తనపై వస్తున్న విమర్శలకు విజయ్ సేతుపతి క్షమాపణలు చెప్పి హుందాగా ప్రవర్తించాడని అందరూ మక్కల్‌ సెల్వన్‌ను అభినందిస్తున్నారు.