அடுத்த படம் 'அயன் 2'? கே.வி.ஆனந்த் விளக்கம்
- IndiaGlitz, [Friday,July 28 2017]
கடந்த இரண்டு நாட்களாக ஒருசில இணையதளங்கள் மற்றும் சமூக வலைத்தளங்களில் கே.வி.ஆனந்த் இயக்கவுள்ள அடுத்த படத்தில் விக்ரம் நடிக்கவுள்ளதாகவும், இந்த படம் கடந்த 2009ஆம் ஆண்டு சூர்யா நடிப்பில் வெளியான 'அயன் 2' படத்தின் இரண்டாம் பாகம் என்றும் செய்திகள் வெளிவந்து கொண்டிருக்கின்றன.
இந்த செய்திகளுக்கு கே.வி.ஆனந்த் தற்போது விளக்கம் அளித்துள்ளார். ரசிகர்கள் பல ஆண்டுகளாக 'கோ 2' மற்றும் 'அயன் 2' படம் குறித்து என்னிடம் கேள்வி கேட்டு வருகின்றனர். பொதுவாக எனக்கு இரண்டாம் பாகம் எடுப்பதில் விருப்பமில்லை. இருப்பினும் எனது 'கவண்' படம் 'கோ' படத்தின் இரண்டாம் போல கருதப்பட்டது.
இந்த நிலையில் எனது அடுத்த படம் 'அயன் 2' என்று வெளியான செய்தியில் உண்மையில்லை. எனது அடுத்த படத்திற்கான திரைக்கதை அமைக்கும் பணியில் தற்போது ஈடுபட்டு வருகின்றேன். இந்த படம் குறித்து இப்போது எதுவும் சொல்ல முடியாத நிலை உள்ளது. மிக விரைவில் எனது அடுத்த படம் குறித்த அதிகாரபூர்வ தகவல் வெளிவரும்' என்று கூறியுள்ளார்.
கே.வி.ஆனந்த் இயக்கவுள்ள அடுத்த படம் 'அயன் 2' இல்லை என்று அவர் மறுத்தாலும், அவருடைய அடுத்த படத்தில் விக்ரம் நடிப்பது குறித்து அவர் எவ்வித மறுப்பும் தெரிவிக்கவில்லை என்பது குறிப்பிடத்தக்கது.