రానా... మీరు విన్న‌ది నిజ‌మే
- IndiaGlitz, [Saturday,June 01 2019]
రానా హీరోగా హిర‌ణ్య క‌శ్య‌పుడి క‌థ‌తో ఓ చిత్రం తెర‌కెక్కనున్న‌ట్టు గ‌త కొంత‌కాలంగా వార్త‌లు వింటూనే ఉన్నాం. అయితే జూన్ ఒక‌టిన ఈ సినిమాకు సంబంధించి అఫిషియ‌ల్‌గా ఓ వార్త బ‌య‌ట‌కు వ‌చ్చింది. ఆ వార్త‌ను వినిపించిన వారు మ‌రెవ‌రో కాదు... ద‌ర్శ‌కుడు గుణశేఖర్. ఆయన ద‌ర్శ‌క‌త్వంలోనే రానా ఈ సినిమాను చేయ‌బోతున్నారు. గుణశేఖర్ ఈ విష‌యాన్ని ట్విట్ట‌ర్ వేదిక‌గా ప్ర‌క‌టించారు.
''హిర‌ణ్య క‌శ్య‌ప చిత్రాన్ని రానాతో చేయ‌బోతున్నాం. దీనికి సంబంధించి మూడేళ్లుగా స్క్రిప్ట్ వ‌ర్క్ జ‌రుగుతోంది. మీరు విన్న‌ది నిజ‌మే. మూడేళ్లుగానే స్క్రిప్ట్ వ‌ర్క్ జ‌రుగుతోంది'' అని ఆయన ట్వీట్ చేశారు. 'బాహుబ‌లి'లో రానా ఫిజిక్ చూసిన వాళ్లెవ‌రైనా ఆయన హిర‌ణ్య‌క‌శ్య‌పుడి పాత్ర‌కు క‌చ్చితంగా స‌రిపోతార‌ని ఒప్పుకోక‌మాన‌రు. 'రుద్ర‌మ‌దేవి' చిత్రాన్ని స్వీయ నిర్మాణంలో తెర‌కెక్కించిన గుణశేఖర్ ఈ తాజా చిత్రాన్ని కూడా సొంతంగా నిర్మిస్తారా? లేకుంటే సురేష్ ఫ్రొడ‌క్ష‌న్స్ స‌హ‌కారంతో నిర్మిస్తారా అనేది మాత్రం తెలియాల్సి ఉంది.